काठमाडौं- नेकपा एकीकृत समाजवादीका अध्यक्ष माधवकुमार नेपालले पार्टी सिध्याउन खोज्ने प्रवृत्तिलाई छुट दिन नसकिने बताएका छन् ।

पार्टी गठनको चार वर्ष पूरा भएको अवसरमा सोमबार काठमाडौंमा आयोजित कार्यक्रममा अध्यक्ष नेपालले पार्टीभित्रै बसेर पार्टीलाई सिध्याउन खोज्ने प्रवृत्तिलाई छुट दिन नसकिने बताएका हुन् ।

पार्टीको पक्षमा बोल्नु र विपक्षमा बोल्नु एउटै कुरा नभएको उल्लेख गर्दै अध्यक्ष नेपालले पार्टीको पक्षमा दृढताका साथ बोल्न निर्देशनसमेत दिए । यसो भनिरहँदा मञ्चमा उनीसँग दुई लाइन संघर्ष गरिरहेका सम्मानित नेता झलनाथ खनाल पनि मञ्चमा थिए।

खनालले पछिल्लो समय अध्यक्ष नेपाल भ्रष्टाचार मुद्दामा मुछिएपछि नेपालविरुद्ध संघर्ष चर्काइरहेका छन् । उनले भ्रष्टाचार जस्तो गम्भीर मुद्दा लागिसकेपछि अध्यक्षले जिम्मेवारीबाट बाहिर रहनुपर्ने मत राखिरहेका छन् ।

यी दुई नेताको संघर्ष भ्रातृ संगठनमा पनि पुगेको छ । अनेरास्ववियूको कलहले समानान्तर कमिटी नै बनेको छ । यस्तोमा नेपालले पार्टीभित्रको असन्तुष्टिलाई कमिटी बैठकभित्रै राख्नुपर्नेमा जोड दिए ।

पार्टीभित्र अनुशासनहीनतालाई छुट दिन नसकिने उनको भनाइ छ । अध्यक्ष नेपालले कसैको लेखाइमा पार्टीमाथि आँच पुर्‍याउने र पार्टी नेतृत्वलाई गाली गर्नेलाई सहेर बस्न नसकिने जिकिर गरे ।

त्यस्तै उनले लिपुलेक क्षेत्रका व्यापारिक सम्बन्ध विस्तार गर्ने भारत–चीनको सहमति स्वीकार्य नरहेको भन्दै सरकारले कुटनीतिक रुपमा आफ्नो स्पष्ट धारणा राख्न सक्नुपर्ने बताए ।

नेपाल बोल्नुअघि सम्मानित नेता खनालले १० औँ महाधिवेशनले अघि सारेको नेपाली समाजवादको कार्यक्रमलाई पार्टीले अझैसम्म प्रकाशन नगरेको भन्दै असन्तुष्टि जनाए । उनले अझै पनि विद्रोहको पुष्टि हुन नसकेकोमा चिन्ता व्यक्त गरे।

देशको समाजवादी कार्यक्रमको रुपलाई अघि बढाउन नेपाली समाजवादको कार्यक्रमलाई प्रकाशन गर्नुपर्ने उनले बताएका छन् । खनालले मुख्य वर्गभित्र नपुगेसम्म साँच्चिकै कम्युनिष्ट पार्टी निर्माण गर्न नसकिने पनि उल्लेख गरेका छन् ।