काठमाडौं– स्वास्थ्य तथा जनसंख्यामन्त्री प्रदीप पौडेल हैजाको सङ्क्रमण फैलिएको वीरगञ्जको नारायणी अस्पतालमा बहुपक्षीय बैठक गर्ने भएका छन् । सचिवालयका अनुसार उनी सोमबार दिउँसो साढे १ बजे अस्पतालमा बहुपक्षीय बैठक गर्न लागेका हुन् । 

वीरगञ्ज महानगरपालिकामा जनस्वास्थ्य स्थितिको अनुगमनसँगै द्रुत स्वास्थ्य प्रतिकार्यका लागि थप जनशक्ति परिचालनसम्बन्धी कार्यका लागि मन्त्री पौडेलले बैठक डाकेको सचिवालयले जनाएको छ । 

वीरगञ्ज महानगर क्षेत्रमा समुदायस्तरमा नै हैजाको सङ्क्रमण फैलिएको छ । तर, अहिलेसम्म हैजाको स्रोत भने पत्ता लाग्न सकेको छैन । गत शुक्रबारदेखि वीरगञ्जका विभिन्न वडामा हैजाका सङ्क्रमित बिरामी भेटिँदै आइरहेका छन् ।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरले अहिलेसम्म वीरगञ्जमा ७९ जना हैजाका सङ्क्रमित बिरामी फेला पारेको जानकारी दिएका छन् ।