तेहरान – इरानको दक्षिणपूर्वी क्षेत्रमा इरानी सेनाले गरेको कारबाहीमा छ जना ‘इजरायल निकट लडाकु’ मारिएको इरानी सरकारी सञ्चारमाध्यमले जनाएका छन्।

‘सिस्तान–बलुचिस्तान प्रान्तमा आतङ्ककारीसँग भएको व्यापक सशस्त्र आक्रमणका क्रममा छ जना आक्रमणकारी मारिएका छन् भने अन्य दुई जनालाई पक्राउ गरिएको छ,’ गुप्तचर सेवाको एक विज्ञप्तिलाई उद्धृत गर्दै इरानी सरकारी समाचार संस्था इरनाले जनाएको छ।

उक्त रिपोर्टमा छापा कहिले मारिएको हो भन्ने बारे कुनै जानकारी दिइएको छैन।

पाकिस्तान र अफगानिस्तानसँग सीमा जोडिएको सिस्तान-बलुचिस्तान लामो समयदेखि सुरक्षा बल र लागुऔषध तस्कर र पृथकतावादीलगायत सशस्त्र समूहबीच झडपको ‘केन्द्र’ बनेको छ।

इरनाले पछिल्लो आक्रमणमा लक्षित समूहको ‘यहूदी प्रकृति’ लाई सङ्केत गर्ने ‘कागजात’ रहेको बताएको छ र यसका सदस्यहरूले इरानको पूर्वमा रहेको ‘महत्त्वपूर्ण’ सुविधामा आक्रमण गर्ने योजना बनाएको बताएको छ।

दुई गुप्तचर अधिकारी र एक प्रहरी अधिकारी झडपमा घाइते भएको इरनाले जनाएको छ।

इरानले यस प्रान्तमा प्रहरी वा इस्लामिक रिभोल्युसनरी गार्ड कोरका सदस्यलाई लक्षित गरी घातक आक्रमण हुने गरेको जनाएको छ।

गत शुक्रबार सुन्नी जिहादी समूह जैश अल-अदल (आर्मी अफ जस्टिस) ले सिस्तान-बलुचिस्तानमा भएको आक्रमणको जिम्मेवारी लिएको थियो जसमा पाँच प्रहरी अधिकारीको मृत्यु भएको थियो।

आइतबार इरानको सरकारी सञ्चारमाध्यमका अनुसार सुरक्षा बलले अर्को जिहादी समूह अन्सार अल फुरकानका सात जना सदस्यलाई सिस्तान–बलुचिस्तानमा पनि हत्या गरेको थियो।

ठूलो सुन्नी मुस्लिम बलुच अल्पसंख्यकको घर रहेको यो प्रान्त शिया बाहुल्य देशको सबैभन्दा गरिब क्षेत्रमध्ये एक हो। (रासस/एएफपी)