दार्चुला – हिमाली जिल्ला दार्चुलामा दुई जनामा डेङ्गु सङ्क्रमण पुष्टि भएको छ । जिल्ला अस्पतालमा उनीहरुमा डेङ्गु सङ्क्रमण पुष्टि भएको हो ।

अस्पतालका सूचना अधिकारी डम्बरदत्त भट्टका अनुसार साउनदेखि भदौको आजसम्ममा दुई जनामा डेङ्गु सङ्क्रमण पुष्टि भएको हो । सङ्क्रमितमा एक महिला र पुरुष रहेका छन् ।

उनका अनुसार महाकाली नगरपालिका–६ घर भएकी महिला र बाँकेको कोहलपुर घर भएका पुरुषमा डेङ्गु सङ्क्रमण पुष्टि भएको हो ।

महिलामा गत साउन तथा पुरुषमा आज मात्रै डेङ्गु सङ्क्रमण पुष्टि भएको हो । उनलाई जिल्ला अस्पतालमै राखिएको र स्वास्थ्यमा केही सुधार भएको सूचना अधिकारी भट्टले बताए ।

जिल्ला अस्पतालमा आर्थिक वर्ष २०८१/८२ मा ३२ जनामा महिला पुरुषमा डेङ्गु सङ्क्रमण पुष्टि भएको थियो । सङ्क्रमित हुनेमा १४ महिला र १८ पुरुष रहेका थिए ।