काठमाडौं– राष्ट्रिय स्वतन्त्र पार्टी (रास्वपा)ले सभापति रवि लामिछानेको पक्षमा सुरू गरिएको हस्ताक्षर संकलन अभियान पश्चिमदेखि पूर्वी नेपालको ‘देश यात्रा’मा निस्किएको छ ।

रास्वपाले सुदूरपश्चिमको कञ्चनपुरबाट ‘देश यात्रा’  सुरू गरेको हो । बुधबारदेखि सुरू भएको ‘देश यात्रा’को नेतृत्व रास्वपाका सचिवालय सदस्य दीपक बोहराले गरेको प्रवक्ता मनीष झाले जानकारी दिए । 

उनले बिहीबार सञ्चारमाध्यमहरूलाई उपलब्ध गराएको जानकारीअनुसार सभापति लामिछानेको पक्षमा देशभरबाट अहिलेसम्म ३४ लाख हस्ताक्षर संकलन भएको छ । यसबीचमा अभियानको लागि सहयोग रकम ६५ लाख संकलन भएको प्रवक्ता झाले जानकारी दिए । 

सहकारी ठगी प्रकरणमा मुछिएका लामिछाने अहिले पुर्पक्षका लागि नख्खु कारागारमा बन्दी जीवन बिताइरहेका छन् । उनलाई साउन ३१ गते भैरहवा कारागारबाट नख्खु कारागार अड्डासार गरिएको थियो ।