काठमाडौँ- नेकपा एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनालबीचको विवाद सेलाउन नपाउँदै युवा संघभित्र भाँडभैलो भएको छ ।

युवा संघ नेपालका इन्चार्ज लक्ष्मण केसीले जारी गरेको सर्कुलरमा आपत्ति जनाएको इतर समूहले आइतबार समानान्तर कमिटी नै बनाएका छन् ।

युवा सङ्घको नवौँ राष्ट्रिय महाधिवेशन आयोजक कमिटी गठन गरेको भन्दै गत साउन २८ मा सर्कुलर जारी भएयता चर्किएको विवाद समानान्तर कमिटी गठनसम्म पुगेको हो।

आइतबार असन्तुष्ट समूहले संघका पदाधिकारी र केन्द्रीय कार्यालय कमिटीको बैठक राखेर सन्दीप राईको नेतृत्वमा नवौँ महाधिवेशन आयोजक कमिटी बनाएको हो ।

कमिटीमा देशभरका २२१ जना नेताहरूलाई समेटिएको छ। समानान्तर आयोज कमिटीका अध्यक्ष राईले पार्टीले ०८१ माघ १४ गते जारी गरेको आपानि ४ बमोजिम संगठनको तत्कालीन नेतृत्व र पदाधिकारी पार्टीको दशौँ महाधिवेशनबाट केन्द्रीय सदस्य भइसकेकाले युवा संघबाट बिदा गरी इन्चार्ज लक्ष्मण केसीलाई युवा संघको सम्मेलन लगायत कामको योजना बनाई अगाडी बढाउन निर्देशन गरेको उनले स्मरण गराएका छन् ।

‘तर ईन्चार्ज कमरेडले मनोमानी ढङ्‌गबाट युवासंघ नेपालको विधान र युवा आन्दोलनको भावना माथि प्रहार गर्नुभयो’, उनले भनेका छन्, ‘अवैधानिक र अराजनीतिक तवरले नवौँ राष्ट्रिय महाधिवेशन आयोजक कमिटी निर्माण गरियो। जसका कारण दक्षिणपन्थी अवसरवादकाविरुद्ध विद्रोहको नेतृत्व गरेका युवा संघ नेपालका पदाधिकारी र स्थायी कमिटी सदस्यले यो निर्णय लिनपुरेको छ ।

यसअघि साउन २८ मा जारी आयोजक कमिटी गठनको सर्कुलरप्रति संघका सहसंयोजक राईले आपत्ति जनाएका थिए । उनले त्यही बेला नै कथित महाधिवेशन आयोजक कमिटीको भ्रममा नपर्न भनेका थिए।

आयोजक कमिटीको अध्यक्ष बनेका राई पूर्वप्रधानमन्त्री खनाल र महासचिव घनश्याम भुसालनिकट हुन् । युवासंघका इन्चार्ज केसी अध्यक्ष नेपालनिकट हुन् । युवा संघमा पनि विवाद सल्किएपछि समाजवादीमा अझै भाँडभैलो बढ्ने चिन्ता देखिएको छ।