काठमाडौं– मधेश प्रदेशका धार्मिक एवम् ऐतिहासिक पर्यटकीय स्थललाई छिमेकी मुलुक भारतसँग जोड्न र प्रचार–प्रसारका लागि भारतीय रक्षामन्त्री राजनाथ सिंहलाई ज्ञापनपत्र बुझाइएको छ ।

मधेश प्रदेशले उद्योग, वाणिज्य तथा पर्यटन मन्त्रालयअन्तर्गतको ‘घुमौँ मधेश, बुझौँ मधेश’ कार्यक्रमका संयोजक विकासकुमार ठाकुरमार्फत् रक्षामन्त्री सिंहलाई ज्ञापन पत्र बुझाएको हो ।

संयोजक ठाकुरले बिहीबार भारतको राजधानी नयाँ दिल्लीमा सिंहलाई बुझाएको ज्ञापन पत्रमा भनिएको छ, ‘हामी भारत सरकारबाट मधेश प्रदेशको सांस्कृतिक, ऐतिहासिक एवम् धार्मिक पर्यटन स्थलहरूको विकास र प्रवर्द्धनमा सहयोगको आशा राख्दछौँ ।’

मधेश प्रदेशले भारत सरकारसँग मधेश प्रदेशको सांस्कृतिक, ऐतिहासिक एवम् धार्मिक पर्यटन स्थलहरूको विकास र प्रवर्द्धनका लागि विभिन्न १० बुँदे मागहरू पनि राखेको छ ।

यस्ता छन् माग

१. नेपाल सरकार र भारत सरकारले आपसमा समन्वय गरेर ‘रामायण सर्किट’अन्तगर्त जनकपुरधामलाई विशेष रूपमा समावेश ।
२. भारत सरकारद्वारा जनकपुर–अयोध्या धार्मिक पर्यटन करिडोरलाई अझै सशक्त बनाउन ।
३. भारतबाट मधेश प्रदेशसम्मका धार्मिक स्थलहरू लागि विशेष पर्यटक बस सेवा-ट्रेन सेवा सुचारु गर्न ।
४. मधेश प्रदेशमा भारतीय लगानी र प्राविधिक सहयोगद्वारा पर्यटन आधार ढाँचाको विकास ।
५. जनकपुरधाम–अयोध्या सीधा नियमित हवाई सेवा प्रारम्भ ।
६. भारतको पर्यटन नीतिमा मधेशका प्रमुख धार्मिक स्थलहरूलाई बोर्डर टुरिज्मअन्तर्गत समावेश गर्न ।
७. ती स्थलहरूको प्रचार–प्रसारका लागि संयुक्त सांस्कृतिक पर्यटन अभियान सञ्चालन गर्न ।
८. भारतीय पर्यटन मन्त्रालयद्वारा मधेशका प्रमुख धार्मिक स्थलहरूलाई अन्तर्राष्ट्रिय धार्मिक पर्यटन मानचित्रमा स्थान दिलाउन ।
९. श्री रामजन्मभूमि आयोध्या र बाबा विश्वनाथको नगरी वाराणसीमा डिजिटल बोर्ड राखेर मधेशका धार्मिकस्थलहरूबारे विस्तृत जानकारी समेट्न ।
१०. ‘सिया विन राम अधुरा, इसलिए पहले अयोध्या फिर जनकपुरधाम’ को नाराका साथ आयोध्यामा जनकपुरधामका प्रचार गर्न ।