काठमाडौं– पुनर्गठित नेपाल सद्भावना पार्टीका अध्यक्ष अनिल कुमार झाले समृद्ध मधेश र अधिकार सम्पन्न मधेशी समुदाय भन्ने पार्टीको स्थापित मान्यताका लागी क्रियाशील हुने बताएका छन् । 

लामो समयदेखि निष्क्रिय रहेको पार्टीलाई पुनर्गठित गरेपछि बिहीबार काठमाडौंमा पत्रकार सम्मेलन गर्दै झाले नेपाल भित्र समृद्ध मधेश र अधिकार सम्पन्न मधेशी समुदाय भन्ने पार्टीको स्थापित सैद्धान्तिक मान्यताका लागी क्रियाशील र सङ्घर्षरत रहने बताएका छन् ।

उनले आफ्नो नेतृत्वमा गरिएको पुनर्गठनलाई निर्वाचन आयोगले औपचारिक रूपमा मान्यता प्रदान गरेको जानकारी समेत दिए । अब पछि परेका समुदायको पहिचान, पहुंच, प्रतिनिधित्व, प्रदेश र प्राकृतिक श्रोत एवं राजस्वको बाँडफाँडमा समान अधिकारका लागी अर्थात् मजबुत संघीयता र अर्थपूर्ण समावेशीकरणको पक्षमा सङ्घर्षरत रहने झाले बताए ।

अध्यक्ष झाले संघियता कार्यान्वयनमा प्रदेश सरकारहरूले देखाइरहेको उदासीनता र केन्द्र सरकारको उपेक्षाभाव पार्टीको चिन्ता रहेको धारणा राखे ।

उनले मधेशी केन्द्रित दलको मोर्चामा रहने वा छुटै कार्यक्रमलाई अघि बढाउने भन्ने बारेमा पार्टीभित्र छलफल गरिने उल्लेख गरे  । हाल पुनर्गठित नेपाल सद्भावना पार्टीमा आफ्नो नेतृत्वमा ९१ सदस्यीय कार्यसमिति गठन भएको उनले जानकारी दिए । 

पुनर्गठित नेपाल सद्भावना पार्टीले सुकुम्वासी समस्या लगायत कुनै पनि समस्याको बहानामा भई रहेको मधेशको भूमि वितरण कार्य लाई अविलम्ब रोक्न सरकार सँग माग गरेको छ भने मधेश लगायत देश भरका किसानले भोगी रहको रासायनिक मलको कमीको समस्याको अविलम्ब समाधानको लागी केन्द्र र प्रदेश सरकारहरूसँग माग गरेको छ । 

अध्यक्ष झाले नेपाल सद्भावना पार्टीको ३६ वर्षको यात्रा पार गर्दै बर्तमान स्वरूप पुनः ग्रहण गर्दासम्म यसबीचमा गरिएका सबै प्रकारका कार्यहरूको स्वामित्व ग्रहण गर्ने बताए ।