काठमाडौं– अमेरिकाले धरान उपमहानगरपालिकाका मेयर हर्क साम्पाङ र उनका समर्थकले पत्रकारलाई धम्की दिएको आरोप लगाएको छ । अमेरिकाको विदेश मन्त्रालयले मङ्गलबार जारी गरेको २०२४ को मुलुकको मानव अधिकार अभ्यास प्रतिवेदनमा मेयर साम्पाङ र उनका समर्थकले खोज पत्रकारिता केन्द्रका पत्रकार गोपाल दाहाललाई धम्की दिएको उल्लेख गरिएको छ ।

प्रतिवेदनमा लेखिएको छ, ‘भ्रष्टाचारबारे समाचार लेख्ने पत्रकारमाथि आक्रमण र धम्कीका केही घटना भएका छन् । यसमा मेयरको रेकर्डबारे खोजमूलक रिपोर्ट लेख्दा धरान उपमहानगरपालिकाका मेयर हर्क साम्पाङ र उनका समर्थकले खोज पत्रकारिता केन्द्रका गोपाल दाहाललाई व्यक्तिगत एवम् व्यवसायिक धम्की दिइएको घटना पनि सम्मिलित छ ।’

प्रतिवेदनमा गत वर्षको तुलनामा नेपालमा मानव अधिकारको अवस्थामा खासै परिवर्तन नभएको पनि उल्लेख गरिएको छ । गैरन्यायिक एवम् एकपक्षीय हत्या, दण्डका रुपमा यातना, अमानवीय वा निकृष्ट व्यवहार, मनोमानी हिरासतमा लिइएका घटना भएको प्रतिवेदनले जनाएको छ ।

त्यसैगरी, नेपालमा पत्रकारमाथि हिंसा वा हिंसाको धम्की एवम् अनुचित पक्राउजस्ता मिडिया स्वतन्त्रता एवम् अभियक्ति स्वतन्त्रतामा गम्भीर बन्देज र बधुँवा मजदुरसहित मानव तस्करीका घटना पनि भएको जनाइएको छ ।

यद्यपि सरकारले मानव अधिकारको दुरुपयोग गर्ने अधिकारीमाथि अनुसन्धान गर्न विश्वसनीय कदम चालेको पनि उक्त प्रतिवेदनमा जनाइएको छ । तर, मानव अधिकार उल्लङ्घन गर्ने अधिकारीलाई दृढतापूर्वक दण्ड भने नदिइएको उल्लेख गरिएको छ ।