काठमाडौं– दक्षिण भारतीय अभिनेता तथा राजनीतिज्ञ कमल हासन हाल सनातन धर्मबारे दिएको टिप्पणीका कारण विवादमा परेका छन्। उनको टिप्पणीपछि बहिष्कारको माग चर्किँदै जाँदा, अब उनलाई मृत्युको धम्कीसमेत आएको छ। 

तमिल स्टार सूर्यको एनजिओ अग्रम फाउन्डेसन को १५ वर्षे समारोहमा हसनले केन्द्र सरकारको राष्ट्रिय योग्यता र प्रवेश परीक्षालाई ‘धेरै एमबीबीएस आकांक्षीको सपना तोड्ने र सनातन धर्मको गलत परिणाम’ भन्दै आलोचना गरेका थिए।

राज्यसभा सांसद तथा मक्कल निधि मैयमका संस्थापक समेत रहेका हासनले शिक्षा मात्र देश परिवर्तनको हतियार भएको दाबी गर्दै, ‘अधिनायकवाद र सनातनको जञ्जाल तोड्न शिक्षा नै प्रभावकारी साधन हो’ भन्ने अडान दोहोर्‍याए।

यो टिप्पणीपछि उनलाई सामाजिक संजाल र सार्वजनिक कार्यक्रममा आलोचना गर्न थालिएको छ। भारतीय मिडिया टाइम्स अफ इंडियाका अनुसार टेलिभिजन अभिनेता रविचन्द्रनले युट्युब अन्तर्वार्तामा हसनलाई ‘अनुभवहीन राजनीतिज्ञ’ भन्दै उनको ‘घाँटी रेट्ने’ धम्की दिएका छन्।

तमिलनाडु भाजपा इकाइले यस विषयमा कडा प्रतिक्रिया जनाउँदै हसनका फिल्महरूको बहिष्कारको माग गरेको छ। भाजपाकी वरिष्ठ नेतृ तमिलिसाई सौन्दरराजनले पनि हसनमाथि हिन्दू मूल्यहरूको अपमान गरेको आरोप लगाउँदै उनको वक्तव्यको निन्दा गरेकी छिन्।

हाल यो विषयमा राजनीतिक र सामाजिक दुवै तहमा बहस चर्किएको छ, जसले धार्मिक आस्था, अभिव्यक्ति स्वतन्त्रता र सार्वजनिक व्यक्तित्वको जिम्मेवारीबारे नयाँ प्रश्न उठाएको छ।