जुम्ला– पातारासी गाउँपालिकाले गत आर्थिक वर्ष २०८१/८२ मा विभिन्न २१७ वटा विकासे योजना सम्पन्न गरेको छ ।  

पालिकाभित्रका सात वटा वडामा जम्मा २२६ वटा योजना सम्झौता भएकामा २१७ वटा निर्माण सम्पन्न भएको गाउँपालिकाका प्रमुख प्रशासकीय अधिकृत नवीन शाहीले जानकारी दिए  । वडा नं १ मा २४ वटा योजनामध्ये २२ वटा र वडा नंं २ मा ४२ योजनामध्ये ४० योजना निर्माण भएका छन् । 

यसैगरी वडा नं ३ मा ३९ मध्ये ३३  र  वडा नं ४ मा ३९ मध्ये ३८ वटा योजना निर्माण सम्पन्न भई सञ्चालनमा आएको प्रमुख प्रशासकीय अधिकृत शाहीको भनाइ छ । 

यसैगरी, वडा नं ५ मा २९ योजनामध्ये सबै, वडा नं ६ मा ३४ मध्ये ३१ वटा र वडा नं ७ मा २४ योजनामध्ये सबै निर्माण सम्पन्न भई सञ्चालनमा आएको पातारासी गाउँपालिकाले जनाएको छ । 

 उक्त योजनाका लागि १५ करोड ७६ लाख २२ हजार रुपैयाँ बजेट खर्च भएको छ । यसरी वडा तहमा विनियोजन भएको कूल बजेटको ८१ दशमलव १२ प्रतिशत विकास बजेट खर्च भएको गाउँपालिकाका प्रमुख प्रशासकीय अधिकृत शाहीले बताए ।

सो गाउँपालिकाले गत आर्थिक वर्षमा १६ लाख ५० हजार रुपैयाँ आन्तरिक राजस्व सङ्कलन गर्ने लक्ष्य राखेकामा लक्ष्यभन्दा बढी रु २३ लाख २९ हजार ६४ हजार सङ्कलन गरेको छ । 

प्रमुख प्रशासकीय अधिकृत शाहीले भने, ‘ठेक्का लगाइएका सातमध्ये बहुवर्षीय एक योजनाबाहेक बाँकी छ वटा योजना सम्पन्न भएका छन् । चालु तर्फ २२ करोड ७९ लाख १६ हजार रुपैयाँ मध्ये ८६ प्रतिशत खर्च भएको छ । ‘

पुँजीगत तर्फ १२ करोड ३३ लाख ७१ हजार रुपैयाँ विनियोजन गरिएकामा ६४ प्रतिशत खर्च भएको गाउँपालिकाका प्रमुख प्रशासकीय अधिकृत शाहीको भनाइ छ ।  रासस