काठमाडौं- नेपाल प्रिमियर लिग (एनपीएल) को दोस्रो संस्करणका निम्ति अक्सन सुरु भएको छ । शनिबार ललितपुरस्थित रोयल टुलिपमा सुरु भएको अक्सनमा प्रतियोगिताका कुल आठ टिमका ३८ स्लट छन् ।

अक्सनमा कुल तीन क्याटागोरी छन् । जसअनुसार क्याटागोरी ‘ए’ मा नौ जना, ‘बी’ मा ३७ जना र ‘सी’ मा ११८ जना छन् । यसअघि क्यानले अक्सनका निम्ति १५० जनाको सूची सार्वजनिक गरेको थियो । तर पछि १४ खेलाडी थपिएका छन् ।

यसैबीच दोस्रो संस्करणका निम्ति सुरु भएको अक्सनबाट राष्ट्रिय टिमबाट समेत खेलिसकेका देव खनाललाई चितवन राइनोजले अनुबन्ध गरेको छ । पहिलो सिजनमा देव कर्णाली याक्सबाट खेलेका थिए ।

देवका निम्ति लुम्बिनी लायन्स र चितवन राइनोजले ‘ए’ क्याटागोरीमा अधिकतम बोली १५ लाख लगाएका थिए । ‘लक्की ड्र’ मार्फत् उनी चितवनको पक्षमा गएका छन् । यसअघि पहिलो नम्बरमै आएका सन्तोष कार्की ‘अनसोल्ड’ भएका हुन् । दोस्रो संस्करणका निम्ति कुल १६४ खेलाडी अक्सनको सूचीमा छन् ।