काठमाडौं – कलाकार राजु पौडेल ‘राजु मास्टर’ लेखन र निर्देशनको जिम्मेवारीसहित ‘मेरी बास्सै’मा फर्किएका छन् । उनले सिरियलमा ‘राजु मास्टर’को पात्रसमेत निर्वाह गर्नेछन् ।

राजुका अनुसार आगामी साताबाट उनलाई सिरियलमा देख्न पाइनेछ । ९२३ भागबाट जिम्मेवारी सम्हाल्ने गरी सिरियल निर्माता कम्पनी मिडियाहबसँग सहमति भएको उनले खबरहबलाई बताए ।

राजु ‘मेरी बास्सै’बाट नै कलाकारितामा स्थापित भएका हुन् । यस सिरियलमा उनी बुम समात्ने जिम्मेवारीबाट प्रवेश गरेका थिए । पछि उनले ‘राजु मास्टर’को चरित्र पाएका थिए । यही पात्रबाट उनी चर्चित र स्थापित भए ।

सामाजिक सञ्जालको पहुँच विस्तारैसँगै टेलिभिजनको क्रेज खस्किएपछि राजुले यो सिरियल छाडेका थिए । ‘मेरी बास्सै’मा १२ वर्ष अभिनय गरेपछि उनले ०७५ साल चैतमा उक्त सिरियल छाडेका थिए ।

त्यसपछि राजु दुई सिरियल ‘जुठे’ र ‘सकस’ लेखन, निर्देशन र अभिनयमा लागे । तीन महिनाअघि राजुले ‘जुठे’ छाडेका थिए ।

६ वर्षपछि आफूलाई दर्शकमाझ चिनाउने सिरियलमा फर्किएकामा राजु उत्साहित छन् । सँगै उनले चुनैती पनि महसुस गरेका छन् । उनी भन्छन्, ‘लेखक र निर्देशकको जिम्मेवारीमा रहेका सिरियलमा थप परिस्कृत र लोकप्रिय बनाउने चुनौती छ भन्ने महसुस भइरहेको छ ।’

राजुले आफ्नो नेतृत्वमा ‘मेरी बास्सै’को चार भाग छायाङ्कन भ्याइसकेका छन् । उनले नयाँ परिवेशमा सिरियललाई निरन्तरता दिने सोचले धादिङको लोकेसनमा छायाङ्कन गरेका छन् ।

मेरी बास्सै हरेक मंगलबार नेपाल टेलिभिजनबाट प्रशारण हुँदै आएको छ । हरेक भाग मिडियाहबको युट्युब च्यानलबाट पनि सार्वजनिक हुँदै आएको छ ।

अब सिरियलमा मास्टर्नीको भूमिकामा अनिता बस्नेत र राजुको सालीको भूमिकामा सबिना आचार्य पनि देख्न पाइनेछ ।

रामचन्द्र अधिकारी ‘गोक्ते काजी‘, सुरवीर पण्डित ‘दाह्री बा’, पल्पसा डंगोल ‘चम्सुरी’ र निरु खड्का ‘निर्मली’सिरियलको मुख्य भूमिकामा छन् ।

राजुले आफ्नो लेखन, निर्देशन र अभिनय रहेको सिरियल ‘सकस’लाई पनि नरन्तरता दिने योजनमा छन् ।