काठमाडौं– बाजुराको बडिमालिका मन्दिरबाट दर्शन गरेर फर्कँदै गर्दा पूर्वशिक्षामन्त्री देवी प्रसाद ओझाका ५२ वर्षीय छोरा विप्लव ओझाको लडेर मृत्यु भएको छ । 

जिल्ला प्रहरी कार्यालय बाजुराका डिएसपी इकबाल हवारीले जानकारी दिएका छन् । हवारीका अनुसार, मन्दिरबाट करिब एक घण्टा तल झर्ने क्रममा उनी करिब ७ सय मिटर तल खोचमा खसेका थिए ।

गोकर्णश्वर–५ काठमाडौं निवासी ओझा राति नै बडिमालिकाबाट फर्किरहेका थिए । अँध्यारोमा बाटोमा हिँड्दा भिरबाट चिप्लिएर खसेको प्रहरीको अनुमान छ । 

बिहान करिब साढे ८ बजे मात्र घटनाको जानकारी भएको र प्रहरीले उद्धार कार्य अघि बढाएको छ ।

आज बडिमालिका शक्तिपीठमा विशेष पूजा भइरहेको छ भने बुढिनन्दामा पनि पूजा आरम्भ भएको छ ।