ललितपुर– ललितपुरमा ‘राष्ट्रिय प्राङगारिक कृषि मेला’ आयोजना हुने भएको छ ।

प्राङगारिक कृषि पद्धति अपनाई माटो र जीवन बचाउन आह्वान गर्दै आगामी बिहीबार १६ गतेदेखि ललितपुरको जावलाखेलस्थित फुटबल मैदानमा राष्ट्रिय प्राङगारिक कृषि मेला आयोजना गर्न लागिएको हो ।

रासायनिक मल र त्यसले मानव स्वास्थ्यमा पारेको असर न्यूनीकरणका साथै प्राङगारिक कृषिको आवश्यक्ताबारे जानकारी दिन मेला आयोजना गर्न लागिएको कृषि विभागका निर्देशक प्रकाश सञ्जेलले बताए ।

मंगलबार पत्रकार सम्मेलन गरी कृषि विभागको संयोजनमा आयोजना हुने सो मेलामा प्राङगारिक कृषि खेतीबारे जानकारी दिने खालका १ सय २५ वटाभन्दा बढी स्टल रहने जानकारी दिइएको थियो ।

४ दिनसम्म चल्ने मेलाको मुख्य आकर्षणको रुपमा ताजा कृषि उपज, प्रशोधित कृषि उपज, रैथाने बालीको खाद्य परिकार, कृषि सामग्री र प्रविधिहरु रहने निर्देशक सञ्जेलले जानकारी दिए । मेलामा करिव २५ लाख बराबरको आर्थिक कारोबार हुने अपेक्षा गरिएको छ ।