काठमाडौं– राष्ट्रिय प्रजातन्त्र पार्टी (राप्रपा)का सांसद् रोशन कार्कीले पूर्वसभामुख सुवाशचन्द्र नेम्वाङको उदाहरण दिँदै सभामुख देवराज घिमिरेले संसद्मा काखापाखा गरेको टिप्पणी गरेकी छन् । 

प्रतिनिधिसभाको बुधबारको बैठकमा उनले जेठ १३ गतेबाट संसद्को चौथो र पाँचौँ ठूला दलहरू भिजिट भिसा प्रकरण छानबिनका लागि संसदीय समिति गठनको माग गर्दै आन्दोलनरत हुँदा पनि सभामुखले वास्ता नगरेको गुनासो गरिन् । 

‘हामी चौथौ र पाँचौँ दल लामो समयदेखि भिजिट भिसा प्रकरणमा आन्दोलनरत छौँ । सभामुख महोदय, म यहाँसँग अनुरोध गर्न चाहन्छु,’ सांसद कार्कीले भनिन्, ‘यहाँमार्फत् म सरकारलाई सोध्न चाहन्छु, के सरकार संसद् प्रति उत्तरदायी हो कि संसद् सरकारप्रति उत्तरदायी ? के हो यो ?’

उनले पूर्वसभामुखले संसद् सञ्चालनबारे सांसदहरूलाई दिएको जवाफलाई उदाहरणका रुपमा अभिव्यक्त गरिन् ।

‘आज मैले स्वर्गीय सुवाश नेम्वाङलाई सम्झिएँ । हामीले उहाँसँग संसद् व्यवस्थाको बारेमा जानकारी लिँदा भन्नुभएको थियो– सदनमा एकजना माननीय मात्रै उठे पनि सभामुखले त्यसलाई एड्रेस गर्नुपर्छ,’ कार्कीले भनिन्, ‘त्यसको समाधान गरेरमात्र संसद् चलाउनुपर्छ ।’