काठमाडौं– नेपाली कांग्रेसका सांसद तथा संसदीय राज्य व्यवस्था तथा सुशासन समितिका सभापति रामहरि खतिवडाले संघीय निजामती सेवा विधेयक, २०८० मा रहेको ‘कुलिङ पिरियड’ हटाउने विषयमा आफूमाथि देखिएको विवादबारे बोलेका छन् । 

उनले आफूबाट गल्ती नभए पनि सभापतिका रूपमा नैतिक जिम्मेवारी लिन तयार रहेको बताएका छन् ।

खतिवडाको नाम कांग्रेस सांसद जीवन परियार नेतृत्वको सात सदस्यीय छानबिन समितिको प्रतिवेदनमा उल्लेख गरिएको छ। 

प्रतिवेदनमा खतिवडा र समितिका सचिव सुरजकुमार दुरा ‘कुलिङ पिरियड’को प्रावधान हटाउने छेडछाडमा जिम्मेवार रहेको ठहर गरिएको छ ।

खतिवडाले खबरहबसँग भने, ‘कुलिङ पिरियड छेडखानीमा संसदीय समितिले नैतिक र राजनीतिक जिम्मेवार बनाएको छ। मैले मेरोतर्फबाट भएको कमजोरीको आज पनि जिम्मेवारी लिन्छु, भोलि पनि लिन्छु ।’

उनले थपे, ‘कुलिङ पिरियड समेटिएको निजामती सेवा विधेयकमा मैले नै हस्ताक्षर गरेर पठाएको हो। त्यसबारे जिम्मेवारी लिन्छु। तर जसले बदमासी गरेको हो, उसलाई कारबाही हुनुपर्छ भनेर म पहिले पनि बोलेको हो ।’

खतिवडाले संसदीय समितिको निर्णयप्रति आफ्नो असहमति नरहेको जनाए । ‘मैले कुलिङ पिरियडबारे उल्लेखित विषय बोल्ड अक्षरमा सही गरेर पठाएको हो। त्यसपछि १५ दिनसम्म सांसदहरूले के हेरेर बसे, किन अध्ययन गरेनन् – मलाई पनि अनौठो लागेको छ।’

उनले संसदीय समितिले राजनीतिक जिम्मेवारका रूपमा सभामुख देवराज घिमिरेलाई समेत जिम्मेवार बनाएको उल्लेख गरे।

खतिवडाले विधेयकका प्रावधानमा राखिएको कुलिङ पिरियडबारे मुख्य सचिव एकनारायण अर्याल र संसद सचिवालयका सचिव पद्मप्रसाद पाण्डे उच्च राजनीतिक नेतृत्वसमक्ष पुगेको प्रसंग उठाए । ‘संसदीय समितिले बनाएको कानुनबारे जुलुस लिएर उनीहरू प्रधानमन्त्रीदेखि शीर्ष नेताहरूकोमा हिँडेको देखिएकै हो’, उनले भने ।