काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टी एकताबद्ध भएको बताएका छन्  । 

सोमबार पार्टी कार्यालय पेरिसडाँडामा बसेको पार्टीको स्थायी कमिटी बैठकपछि प्रचण्डले पार्टीलाई एकताबद्ध गर्ने चुनौती जिम्मेवारीपूर्वक पुरा गरेको बताएका हुन्  ।

उनले  सुदृढ एकताका साथ सबै खाले गुटबन्दी, समूहबद्धताको अन्त्य गर्ने सङ्कल्पको सामूहिक प्रतिबद्धता गरिएको जिकिर गरे ।

मुलुकमा अहिले देखिएका समस्याको अन्त्यका लागि आन्दोलन गर्ने निर्णय बैठकले गरेको उनले बताए  । प्रचण्डले कुलिङ अफ पिरियडमा भएको चलखेलमा दोषी देखिएकालाई कारबाही गर्नेगरि छानबिन समितिले प्रतिवेदन बुझाउनुपर्ने स्पष्ट पारे । 

त्यस्तै बैठकपछि माओवादी उपमहासचिव जनार्दन शर्माले सबै एजेन्डामाथि बैठकमा खुला रूपमा छलफल भएको बताए । वैचारिक, राजनीतिक, सांगठानीक सवैका सन्दर्भमा गम्भीर रूपमा बहस भएको उनको भनाइ छ ।  

चार दिनदेखि जारी माओवादीको स्थायी कमिटी बैठक सोमबार नै सम्पन्न भएको छ ।