काठमाडौं- नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टी फेरि एक भएको बताएका छन् ।

चार दिनदेखि चलेको स्थायी समिति बैठक समापनपछि सोमबार पेरिसडाँडामा बोल्दै उनले यस्तो बताएका हुन् ।

उपमहासचिव जनार्दन शर्माले चर्काएको दुई लाइन संघर्षबारे केही नबोलेका उनले अब माओवादी फेरि एक भएको उल्लेख गरे ।

‘समग्र विषयमा प्रवक्ताले राख्नु हुन्छ । पहिलो कुरा त देशको लोकतान्त्रिक आन्दोलन र गणतन्त्रको सुदृढीकरणमा माओवादी अब खटिन्छ’, उनले भने, ‘हामीले नै देशमा यो परिवर्तन गरेका हौँ । त्यसैले यसमा अबको हाम्रो जोड रहनेछ ।’

उनले यो स्थायी समिति बैठकपछि पार्टी एकताबद्ध भएको बताए । ‘पार्टी एकताबद्ध भएको छ । हामीले सामूहिक प्रतिवद्धतासहित सबैखाले गुटबन्दीको अन्त्य गरेका छौँ’, उनले भने, ‘अब माओवादीमा सबैखाले गुट-उपगुट नरहने भन्ने निष्कर्षमा हामी पुग्यौँ ।’

उनले फेरि एक पटक माओवादीले जनतामा जाने निर्णय लिएको बताए । उनले देशमा देखिएको विसंगतिको विषयमा आन्दोलित हुने निर्णय पनि बैठकले गरेको बताएका छन् ।