काठमाडौं– प्रधानमन्त्री केपी शर्मा ओलीले संसदभित्र राजावादी र अराजकतावादीको उपस्थितिका कारण देशको व्यवस्था र प्रणालीमाथि समस्या उत्पन्न भएको र प्रतिछाप परेको बताएका छन् ।

आइतबार ‘लोकतन्त्र र जनअभिमत : नेपालको निर्वाचन इतिहास’ पुस्तकको लोकार्पण कार्यक्रमलाई सम्बोधन गर्दै प्रधानमन्त्री ओलीले राजावादी दल र अराजकतावादलाई लक्षित गर्दै प्रणाली बचाउन निर्मम हुनुपर्ने बताए । ओलीले संविधान नमान्ने र लोकतन्त्र नमान्ने मान्छेले संसद अवरोध गरेको बताए ।

‘हामी नरममा अत्यन्त नरम, डेमोक्रेसीका लागि हामीले ‘टफ’ हुनुपर्छ । प्रणाली बचाउन टफ हुनुपर्छ । जो संविधान मान्दैन, प्रणाली मान्दैन लोकतन्त्र मान्दैनन ती मान्छे संसदमा छन् र त्यस्ता मान्छेले संसद अवरोध गरिरहेका छन् । तिनीहरूलाई संसद चाहिएकै छैन त ।’ ओलीले भने, ‘उनीहरूलाई अर्कै सिस्टम चाहिएको छ कसैलाई एनार्किजम (अराजकतावाद), कसैलाई राजतन्त्र चाहिएको छ, संसद किन चाहियो ?’

राजावादी र अराजकतावादीले संसद देख्न सुन्न नचाहेको बताए । उनले त्यस्ता मान्छे संसदभित्रै पसेर भत्काउने र बाहिरबाट पनि भत्काउने काममा लागेको बताए ।

‘बाहिरबाट मात्रै होइन कि भित्रै पसेर भत्काउने भित्रै पसेर आगो बाल्ने सोचमा भएका मान्छे पनि भएपछि अनि प्रणालीमा समस्या उत्पन्न हुँदैन ?’ ओलीले प्रश्न गरे, ‘एनार्किस्टले बुथ कब्जा गर्दैन ? के गर्दैन ?’

ओलीले पुराना पार्टीहरूमा समेत त्यस्ता कमजोरी रहेकाले ती कमजोरीलाई हटाउनु पर्ने बताए । प्रधानमन्त्री ओलीले नयाँ शक्तिहरूलाई संविधान र कानूनभित्र अधिकारको प्रयोग गर्न सबै स्वतन्त्र छन् भनेर बताउन आवश्यक रहेको बताए ।