काठमाडौं– नेपाल आदिवासी जनजाति महासंघले यस वर्षपनि मौलिक रूपमा विश्व आदिवासी दिवस मनाउने जनाएको छ ।  

महासंघले आइतबार काठमाडौंमा पत्रकार सम्मेलन गर्दै प्राकृतिक श्रोत, जल, जमिन र जंगलमाथि आदिवासी जनजातिको अधिकार सुनिश्चित गर, आइएलओ १६९ सम्बन्धी सर्वोच्चको निर्देशनात्मक आदेश कार्यान्वयन गर भन्ने नाराका साथ साउन २४ गते ३१ औँ विश्व आदिवासी दिवस मनाउने जनाएको हो । 

दिवसका अवसरमा सप्ताहव्यापी रूपमा विभिन्न जातीय समुदायहरूको झाँकी तथा र्‍याली प्रदर्शन एवं विविध कार्यक्रमहरू प्रस्तुत गरिने महासंघका अध्यक्ष गेल्जे लामा शेर्पाले जानकारी दिए ।

त्यस्तै दिवसका अवसरमा आयोजना हुने मूल समारोहमा विभिन्न जातीय संस्थाहरूबाट आ–आफ्नो मौलिक नृत्यहरू प्रस्तुत हुने उनले बताए । 

विश्वका आदिवासीहरूले हरेक वर्षको ९ अगस्टलाई अन्तर्राष्ट्रिय आदिवासी दिवसको रूपमा मनाउने गर्दछन् । संयुक्त राष्ट्र संघले अगस्ट ९ तारिखलाई विश्व आदिवासी दिवसका रूपमा मनाउने घोषणा गरेपछि सन् १९९४ देखि हरेक वर्ष यो दिवस मनाउन थालिएको हो ।