काठमाडौं- प्रधानमन्त्री केपी शर्मा ओलीले ज्ञानेन्द्र शाहलाई कुशको राजाको संज्ञा दिएका छन् ।

उनले नेपालमा राजतन्त्र सडेगलेको पाखण्डी सिद्धान्त भएको पनि बताएका छन् । आइतबार काठमाडौंमा आयोजित एक पुस्तक विमोचन समारोहलाई सम्बोधन गर्दै उनले यस्तो बताएका हुन् ।

‘राजतन्त्रबारे मलाई खासै केही भन्नु छैन । यो एउटा सडेगलेको पुरानो जन्मसिद्ध श्रेष्ठताको कुनै आधार नभएको यो एउटा पाखण्डी सिद्धान्त हो । यसलाई कुनै सचेत मान्छेले स्वीकार्न सक्दैन’, उनले भने, ‘नागरिक सर्वोच्चतालाई नस्वीकारेर एउटा व्यक्तिको सर्वोच्चता, परिवारको सर्वोच्चता स्वीकार्नु भनेको अज्ञानता हो । कायरता हो ।’

उनले आफूले अरू देशको कुरा नगरेको पनि बताए । ‘हाम्रो देशको सन्दर्भमा यो जनताले त्यही रुपमा लिएर फ्याँकिसकेको कुरा हो । फ्याँक्नै पर्दथ्यो’, उनले भने।

राजतन्त्रको अन्त्य दरबार हत्यकाण्डबाट भएको पनि प्रधानमन्त्री ओलीले बताए ।

‘दरबार हत्याकाण्ड भनेको सानो कुरा हो ? विचार गर्नुस् त, त्यो सानो कुरा हो ?’, उनले भने, ‘हत्याकाण्डपछि कुशको राजा स्थापना गरेको भन्छु मैले । त्यो असली राजा नै होइन । राजा मारिए, रानी मारिए, राजाको छोरा मारिए, युवराज मारिए, संविधानले कहाँ चाहिँ यता उता नभएको भाइ खोजेर ल्याएर बनाउनु भनेको छ ? दरबार हत्याकाण्डको कहाँ परिकल्पना गरेको छ ?’

तत्कालीन राजा ज्ञानेन्द्र शाहले जनताको अधिकार खोसेर कठपुतली आयोग बनाउँदै कांग्रेस सभापति शेरबहादुर देउवामाथि पनि मुद्दा चलाएको ओलीले स्मरण गराए ।

उनले २००७ सालमा राजा फर्काएर गलत गरेको भन्दै त्यसबेलाको निर्णयको आलोचना गरे । ‘यो सबै २००७ सालमा राजा फर्काएर गल्ती भएको हो । दिल्ली गइसकेका राजालाई उतै बस्न दिएको भैहाल्थ्यो नि’, उनले भने, ‘त्यसमा पनि नजाऊँ, त्रुटि चाहिँ भयो ।’