काठमाडौं- नेकपा माओवादी केन्द्रले आतइबार पेरिसडाँडास्थित पार्टी केन्द्रीय कार्यालयमा शहीद स्मृति कार्यक्रम आयोजना गर्‍यो ।

उक्त कार्यक्रम दोलखाको बोत्लेमा २०५९ साउन १७ गते तत्कालीन राज्य पक्षबाट मारिएका १५ जनाको सम्झनामा गरिएको थियो ।

तत्कालीन राज्य पक्षबाट मारिएकाहरूको सम्झनामा गरिएको कार्यक्रममा शोक र तनाव हुनु अनौठो भएन । किनभने त्यहाँ मारिनेहरूका परिवार पनि सहभागी थिए ।

शोकको माहोलबची एकजना माओवादीका शहीद परिवारका सदस्यले मञ्चमै उक्लिएर रूवाबासी गरे । यसरी रुवाबासी गर्ने माओवादी कार्यकर्ताको नाम शंकर लामा थियो । उनले मञ्चमा उक्लिएर अश्रमुश्रित स्वरमा भावुक हुँदै बोले । उनले सम्बोधनका क्रममा माओवादी नेतृत्वसँग गम्भीर भएर गुनासो पोखे ।

लामाले शनिबार पत्नीलाई गुमाएका थिए । कार्यक्रममा बोल्ने क्रममा भावुक भएका उनले पार्टीको शहीदसम्म्बन्धी दृष्टिकोण र उनीहरूलाई सम्मान गर्ने व्यवहारमै वर्गीयता देखिएको बताए ।

‘अब त शहीद पनि वर्गीय भइसके छन्,’ भावुवक भएका उनले भने, ‘नेताहरूका आफन्त शहीद हुँदा भव्य कार्यक्रम हुन्छ। तर हामी जस्ता सर्वसाधारणको परिवारसँग जोडिएका शहीदलाई सम्झिन पनि गाह्रो मानिन्छ । उनीहरूको स्मृति दिवस नै मनाइँदैन, पार्टीले ओझेलमा पार्ने काम गर्छ।’

उनले दोलखामा मारिएका शहीदहरूलाई सम्झनका लागि यो कार्यक्रम गर्न आफूले १० दिनदेखि कराउनुपरेको गुनासो गरे । ‘देशभरका शहीदहरूको अभिलेख राखियोस् । सबैलाई उनीहरूको स्मृति दिवसमा पार्टीले सम्झेओस् भन्ने मेरो उद्देश्य हो’, लामाले माओवादी अध्यक्ष पुष्पकमल दाहाल प्रचण्डसहित उपस्थित उक्त कार्यक्रमा भने, ‘त्यसो हुन सकेमा शहीद परिवार र घाइतेलाई केही मलहम पट्टी पनि मिल्छ । शहीदहरूलाई पनि शान्ति मिल्छ । शहीद र तिनको योगदान नभुलेमा हाम्रो पार्टी पनि केही राम्रो हुन्थ्यो ।’

उनले २०५९ साउन १७ गते दोलखाको बोत्लेमा भएको नरसंहार सम्झिँदै आफू मुस्किलले बाँचेको बताए । मारिएका १४ जना साथीसँगै भए पनि आफूले हामफालेर जोगाउन सफल भएको लामाले बताए ।

लामाले माओवादी नेतृत्वसँगै पेरिसडाँडामा उपस्थित सञ्चारकर्मीसँग पनि मनग्गे गुनासो पोखे । उनले माओवादीलाई १७ हजारको हत्यार भनेकोमा चित्त दुखाएका रहेछन् ।

‘तपाईंहरूले माओवादीलाई १७ हजारको हत्यारा भन्नु हुन्छ । तपाईंहरूले तथ्यमै टेकेर लेखेको हो त ? यदि होइन भने तथ्यमा टेकर माओवादी आन्दोलनले देशमा राजनीतिक परिवर्तनका लागि दिएको योगदान र उक्त आन्दोलनक वास्तविक उद्धेश्यबारे बुझेर मात्रै लेख्ने गर्नुहोस् ।’

उनले प्रचण्डसहितका नेताहरूसामु पदको पछाडि लागेर बिग्रिएको बताए । कार्यकर्ताहरूलाई पदका लागि मरिहत्ते नगर्नु भने पनि नेताहरू नै त्यसकै लागि बिग्रिएको पनि उनले बताए ।

‘माओवादी आन्दोलनका क्रममा नेताहरूले हामी कार्यकर्तालाई ‘पदलोलुप नहुनू’ भन्दै प्रशिक्षण दिने गर्नु हुन्थ्यो’, उनले भावुक हुँदै भने, ‘अहिले तिनै नेताहरू पदलोलुप हुनु भएको छ। पद प्राप्तिको होडबाजी चलाउनु भएको छ । हाम्रो पार्टीमा उपाध्यक्ष, उपमहासचिव र सचिव सात–सात जना चाहिने हो र ? हाम्रै पार्टीलाई कुनै बेला एकजना महामन्त्रीले चलाएको थाहा छ ।’

यस कार्यक्रममा दोलखाको बोत्लेमा तत्कालीन सुरक्षाकर्मीद्वारा हत्या गरिएका १५ जनाको स्मृतितमा घटनासम्बन्धी वृत्तचित्र प्रदर्शन गरिएको थियो।

अध्यक्ष प्रचण्डले बोत्ले घटनामा मारिएका तथा घाइतेका परिवारलाई सम्मान पनि गरे । माओवादीले जनयुद्धको उद्धेश्य भुलेर संसदीय भासमा भासिएको गुनासो भइरहेका बेला मुश्किलले ज्यान जोगाएका लामाको भावुक सम्बोधनले पेरिसडाँडा स्तब्ध भएको थियो ।

भिडियोमा पनि हेर्नुहोस् :