काठमाडौं– बागमती प्रदेशमा सत्ता संघर्ष चलिरहेका बेला नेपाली कांग्रेस र नेकपा (एमाले)का शीर्ष नेताहरू बालुवाटारमा जुटेका छन् ।

बागमतीमा वर्तमान मुख्यमन्त्री बहादुरसिंह लामा र कांग्रेस सांसद इन्द्र बानियाँबीचको कलहले प्रदेश सरकार समस्यामा परेका बेला दुई दलका नेता संवादमा जुटेका हुन् ।

सांसद बानियाँले बुधबार भएको मतदानबाट २२ मत ल्याउँदै लामालाई संसदीय दलको नेताबाट हटाइसकेका छन् । लामाले १४ मत मात्रै पाए । तर पनि लामाले संविधानअनुसार आफूले पद छाड्नु आवश्यक नरहेको अडान राखेका छन् ।

उता एमालेले भने कांग्रेस केन्द्रको संस्थागत निर्णय कुर्ने जनाएको छ । बुधबार नै बसेको कांग्रेस संसदीय दलको बैठकले कांग्रेसको संस्थागत निर्णयअनुसार अघि बढ्ने जनाएको छ।