काठमाडौं- रसुवाको गोसाइकुण्डमा नुहाउने क्रममा यही आइतबार डुबेर ज्यान गुमाएका दुईजना दाजुभाइको शव सुरक्षाकर्मीको टोलीले काँधमा बोकेरै सदरमुकाम धुन्चे ल्याउँदै छन् ।

मोरङको बेलबारी र विराटनगरका दाजुभाइ सुजन ढकाल र मनोज न्यौपानेको शव सेनासहितका सुरक्षाकर्मीले स्ट्रेक्चरमा बोकेरै चन्दनबारी गुम्बासम्म ल्याइसकेका छन्। उनीहरू मामा र फुपूका छोरा हुन् ।

आइतबार गोसाइकुण्डमा चिप्लिएर एकजना डुबेपछि बचाउन पसेका अर्काको पनि ज्यान गएको थियो । विराटनगर महानगरपालिका-३ का २६ वर्षीय सुजन ढकाल र बेलबारी नगरपालिका-११ का २८ वर्षीय मनोज न्यौपानेले गोसाइकुण्डमा डुबेर ज्यान गुमाएका थिए ।

उनीहरू डुबेको खबर आएपछि धुन्चेबाट गएको सेना र प्रहरीको टोलीले सोमबार बिहान १० बजे शव निकालेको थियो । उनीहरूको शव धुन्चेसम्म ल्याउन सेनाले ठूलो मिहिनेत गर्नु परेको हो ।

गोसाइकुण्ड गाउँपालिका–५ बाट धुन्चे ल्याउन सेनाले स्ट्रेक्चरको सहयोग लिएको हो। प्रतिकूल मौसमले हेलिकप्टर लैजान सम्भव नभएकाले दुवै शव स्थलमार्गबाट बोकेरै ल्याइएको हो ।

नेपाल प्रहरी, सशस्त्र प्रहरी र नेपाली सेनाको संयुक्त टोलीले दुवैजनाको शव स्ट्रेचरमार्फत् पालैपालो बोकेर चन्दनबारी गुम्बामा ल्याएको थियो । अब उनीहरूको शवलाई बुधबार बिहान धुन्चे झार्न थप टोली त्यसतर्फ गएको छ।

शनिबार ढकाल र न्यौपानेसहित १३ जना युवा साउने तीर्थका लागि काठमाडौंबाट रसुवा आएका थिए । ११ साउन आइतबार बिहान उनीहरू रसुवाबाट गोसाइकुण्ड पुगेका थिए । कुण्डमा नुवाउने क्रममा डुबेपछि बाँकी साथीहरूले घटनाबारे आफन्त र साथीलाई जानकारी गराएका थिए ।