काठमाडौँ – नेपाल अधिकांश वस्तु आयात गरेर निर्वाह हुँदै आएको देश हो । यद्यपि; कतिपय कच्चापदार्थ र आंशिक प्रशोधन गरेर नेपालबाट पनि वस्तु निर्यात हुने गरेको छ ।

तर, भन्सार विभागको तथ्याङ्कले गत आर्थिक वर्षमा नेपालबाट भएको कतिपय वैदेशिक व्यापार भने अति शङ्कास्पद र अचम्भित पार्ने खालको देखिएको छ । नेपाललाई ट्रान्जिट बनाएर गरिएको रेजर ब्लेड (दाह्रीकपाल लगायत रौँ खुर्कने पत्ती) को व्यापार अनौठो देखिएको हो ।

गत आर्थिक वर्षमा नेपालमा दुई अर्ब २५ करोड चार लाख ८९ हजार रुपैयाँ बराबरको चार करोड दुई लाख ५६ हजार ८९२ पिस सेफ्टी रेजर ब्लेड र यसलाई च्याप्ने स्ट्रिप्स आयात भएको भन्सार विभागको तथ्याङ्कले देखाएको छ । जसको मूल्यप्रति गोटा ५५ रुपैयाँ ९० पैसा परेको देखिन्छ ।

सो रेजर आयात गर्दा सरकारले गत आर्थिक वर्षमा ६८ करोड ४९ लाख रुपैयाँ भन्सार राजस्व आम्दानी गर्‍यो ।

सोही रेजर ब्लेड नेपालबाट फेरि युनाइटेड अरब इमिरेट्स (युएई) र सिङ्गापुरमा अस्वाभाविक मूल्य कायम गरी निर्यात भएको विभागको तथ्याङ्कले देखाएको छ ।

विभागका अनुसार गत आर्थिक वर्षमा दुई अर्ब २२ करोड पाँच लाख ६५ हजार रुपैयाँ बराबरको चार लाख ३६ हजार ३५५ थान रेजर ब्लेड संयुक्त राज्य अरबमा नेपालको भन्सार नाका हुँदै निर्यात भएको थियो । जसको निर्यात मूल्य प्रतिगोटा पाँच हजार ८८ रुपैयाँ ८९ पैसा कायम गरिएको छ । जुन मूल्य आयातको तुलनामा प्रतिगोटा पाँच हजार ३२ रुपैयाँ ९८ पैसाले बढी हो ।

त्यस्तै, गत आर्थिक वर्षमा नेपालबाट सिङ्गापुरमा ९३ लाख ४४ हजार रुपैयाँ बराबरको ५०० थान रेजर ब्लेड निर्यात भएको विभागको तथ्याङ्कले देखाउँछ । जसको मूल्य प्रतिगोटा १८ हजार ६८८ रुपैयाँ पर्न गएको देखिन्छ । जुन मूल्य नेपालमा आयात भएको रेजर ब्लेडको तुलनामा प्रतिगोटा १८ हजार ६३२ रुपैयाँले बढी हो ।