एजेन्सी– इरानी विदेशमन्त्री मोहम्मद जवाद जारिफले पदबाट राजीनामाको घोषणा गरेका छन् । उनले सामाजिक सञ्जालमार्फत् राजीनामा दिएको घोषणा गरेका हुन् ।

उनले आफूले इरानी नागरिकको सेवा र सहयोग गर्न नसकेको भन्दै माफी समेत मागेका छन् । यद्यपि उनको राजीनामा राष्ट्रपति हसन रौहानीले हालसम्म स्वीकृत गरिनसकेको बताइएको छ ।

उनी सन् २०१३ मा इरानको विदेशमन्त्रीमा नियुक्त भएका थिए । सन् २०१५ मा इरान र अमेरिकासहित बेलायत, जर्मनी, युरोपेली युनियन, फ्रान्स, रुस, चीनबीच भएको आणविक सम्झौतामा जरिफको भूमिका महत्वपूर्ण रहेको बताइन्छ । उनले राजीनामा दिनुको कारण स्पष्ट भइसकेको छैन ।

यद्यपि पछिल्लो समय अमेरिकाले इरानसँग भएको आणविक सम्झौता अस्वीकार गर्ने घोषणा गरेपछि इरानभित्र जरिफमाथि चर्को दबाब रहँदै आएको थियो ।