काठमाडौं– स्वास्थ्य तथा जनसंख्या मन्त्री प्रद पौडेलले नेताहरूको पावर लगाएर सरुवा रोक्ने प्रवृत्तिले उपत्यकाबाहिर चिकित्सक पठाउन नसकिएको गुनासो गरेका छन् । 

मन्त्रालयको जिम्मेवारी सम्हालेको एक वर्ष पुगेको अवसरमा उपलब्धि सार्वजनिक कार्यक्रममा आफ्नो अनुभव सुनाउँदै उपत्यका बाहिरका अस्पतालहरूमा सरुवा रोक्न चिकित्सकहरूले उच्च तहका नेताहरूको पावर लगाउने गरेको गुनासो गरे । 

उपत्यका बाहिर विज्ञ चिकित्सकहरू किन कम पठाइन्छ भन्ने पत्रकारको जिज्ञासामा उनले भने, मैले स्वास्थ्यमन्त्री भएर केही कुरा लुकाएको छैन । गजेन्द्ररायणमा एक जना मात्रै स्थायी दरबन्दी छ तर सरुवा गर्‍यो जानुहुन्न, नेताहरूबाट पावर लगाउनुहुन्छ, अनि नेताहरूले पनि मेरो मान्छेलाई किन सरुवा गरेको रोक भन्दै फोन गर्नुहुन्छ ।’ 

मन्त्री पौडेलले थपे, ‘भाषण ठूला-ठूला गर्ने तर आफ्नो मान्छेको सरुवा गर्दा रोक्न दबाब दिनुहुन्छ । यसले गर्दा उपत्यका बाहिरका सरकारी अस्पतालमा विशेषज्ञ चिकित्सक पुर्‍याउनै समस्या छ, हामीले चिकित्सकलाई अनुनय-विनय गरेका छौँ, सरकारी जागिर खाएपछि खटाएको ठाउँमा गइदिनुस् ।’

मन्त्री पौडेलले स्वास्थ्य मन्त्रालयको जिम्मेवारी समालेको एक वर्षमा आफूले स्वास्थ्य सेवामा उल्लेखनीय काम गरेको पनि बताएका छन् ।