काठमाडौं– पाकिस्तानको दक्षिण–पश्चिम प्रान्त बलुचिस्तानमा प्रेम विवाह गरेका एक जोडीलाई सार्वजनिक रूपमा गोली हानी हत्या गरिएको छ ।

घटनाको दुःखद भिडिओ सामाजिक सञ्जालमा भाइरल भएको छ । बलुचिस्तानका मुख्यमन्त्री सरदार सरफराज बुगटीले घटनाको ध्यानाकर्षण गर्दै आरोपीलाई पक्राउ गर्न आदेश दिएका छन् ।

डन न्यूजका अनुसार २० भन्दा बढी हतियारधारी मानिसहरूले ती जोडीलाई पहाडमा लगेर निर्ममतापूर्वक हत्या गरेका थिए । घटनाको भिडिओ सामाजिक सञ्जालमा भाइरल भएको थियो ।

बलुचिस्तान सरकारका प्रवक्ता शाहिद रिन्दले भने– ‘मुख्यमन्त्रीले भिडिओको बारेमा ध्यान दिनुभएको छ र घटनाको अनुसन्धान गर्न र संलग्न संदिग्धहरूलाई तत्काल पक्राउ गर्न आदेश दिनुभएको छ ।’

उनले घटनास्थल र संदिग्ध व्यक्तिहरू पहिचान गर्ने प्रयास भइरहेको बताए । उनले यस्ता क्रूर कार्यहरू असहनीय भएकाले अपराधीहरूलाई कानुनको कठघरामा ल्याइने बताए ।