काभ्रे– काभ्रेपलाञ्चोक जिल्लाको विकट महाभारत गाउँपालिका अध्यक्ष कान्छालाल जिम्बाले गृहमन्त्री रमेश लेखकलाई भेटेर ध्यानाकर्षण गराएका छन् । 

काभ्रेपलाञ्चोक जिल्लामा गएको वर्ष असोज १० देखि १२ गतेसम्म परेको अविरल वर्षा र त्यसपछि आएको बाढी–पहिरोले व्यापक क्षति पुर्‍याएकोमा अझैसम्म पुननिर्माण नहुँदा निराश भएका स्थानीयवासी प्रतिनिधित्व गर्दै अध्यक्ष जिम्बाले औपचारिक ध्यानाकर्षण गराएका हुन् । 

गृहमन्त्रीलाई बुझाइएको ध्यानाकर्षण पत्रमा अध्यक्ष जिम्बाले बाढी–पहिरोबाट निजी आवासदेखि लिएर पूर्वाधारसम्म ध्वस्त भए पनि एक वर्ष बित्न लाग्दा पनि अपेक्षित पुनःनिर्माण नहुँदा सेवाग्राहीमा निराशा उत्पन्न भएको उल्लेख गरेका छन् । 

उनले भनेका छन्, ‘नेपाल सरकारले ती पालिकाहरुलाई संकटग्रस्त क्षेत्र घोषणा गरेको छ र गृह मन्त्रालय लगायत विभिन्न मन्त्रालयका उच्चस्तरीय टोलीहरू स्थलगत अवलोकनमा आउँदा पुनःनिर्माणको आशा गरिएको थियो । तर, हालसम्म प्रभावकारी पहल नहुँदा पीडित थप पीडामा छन् ।’

अध्यक्ष जिम्बाले ध्यानाकर्षण पत्रमार्फत सरकारलाई शीघ्र र प्रभावकारी रूपमा पुनःनिर्माण कार्य अघि बढाउन विशेष अनुरोध गर्नुभएको छ । 

ध्यानाकर्षण पत्रमा निम्न चार मुख्य मागहरू उठाइएको छ :

– निजी घर पुनःनिर्माण कार्यविधि संशोधन
नेपाल सरकारले तयार पारेको कार्यविधिमा स्थानीय तहबाट २० प्रतिशत साझेदारी गर्ने व्यवस्था रहेकोमा, त्यसले स्थानीय तहको राजस्व क्षमताको मूल्याङ्कन नगरेको भन्दै उक्त व्यवस्था तत्काल संशोधन गर्न अनुरोध गरिएको छ ।

– संघीय तथा प्रदेश बजेटमा पुनःनिर्माण योजना समावेश

संघीय र प्रदेश सरकारको नीति तथा कार्यक्रम र बजेटमा क्षतिग्रस्त भौतिक संरचनाको पुनःनिर्माणका लागि कुनै ठोस योजना नआएको भन्दै आवश्यक योजना समावेश गर्न आग्रह गरिएको छ ।

– प्रमुख सडक तथा पुलको पुनःनिर्माण

नमोबुद्ध, रोशी र महाभारत जोड्ने थानसिङबेशी पुल तथा सिपाली–बुढाखानी–बनखु सडक बाढीले तहसनहस पारेको हुँदा तत्काल पुनःनिर्माण गर्न माग गरिएको छ ।

– विपी राजमार्गको पुनःनिर्माणमा तीव्रता

विपी राजमार्गको मर्मत र पुनःनिर्माण अपेक्षित गतिमा नहुँदा दैनिकरूपमा राजमार्ग बन्द गर्नुपर्ने अवस्था आएको भन्दै त्यसको द्रुत पुनःनिर्माणको माग गरिएको छ ।