काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले युवालाई भ्रष्टाचारविरुद्ध सशक्त भूमिका खेल्न आह्वान गरेका छन् । 

ललितपुरको सुनाकोठीमा बिहीबार ‘श्रम र उत्पादनमा वाईसीएल अभियान’को उद्‌घाटन गर्दै उनले युवालाई भ्रष्टाचारविरुद्ध सशक्त भूमिका खेल्न आह्वान गरेका हुन् ।  

माओवादी केन्द्रले प्रतिपक्षको हैसियतले संसद्मा सरकारको असफलता र भ्रष्ट्राचार उजागर गर्दै आएको अध्यक्ष प्रचण्डको भनाइ थियो । 

‘यदि सरकार यसरी नै भ्रष्टाचारमा लिप्त् रहिरह्यो भने, हामी बाध्य भएर छिट्टै सडकबाटै आन्दोलन गरेर हटाउनु पर्ने हुन्छ,’ उनले भने । 

अध्यक्ष प्रचण्डले वाईसीएल नेपालले नीतिगत निर्णयमार्फत राष्ट्रिय रूपमा सञ्चालनमा ल्याएको श्रम अभियानलाई पार्टीले अघि सारेको ‘उत्पादन ब्रिगेड’को निरन्तरता र एक महत्वपूर्ण आयाम भएको उल्लेख गरे । 

‘यो अभियान माओवादी आन्दोलनको वैचारिक र व्यवहारिक गहिराइसँग जोडिएको विषय हो,’ उनले भने, ‘यसका लागि म वाईसीएललाई धन्यवाद दिन चाहन्छु ।’

कार्यक्रममा वाईसीएल नेपालले देशभर ५५ ठाउँबाट अभियान सञ्चालन गरेको जानकारी दिइएको थियो ।