काठमाडौं- चिनियाँ रेडक्रस सोसाइटीले रसुवाका बाढी प्रभावितहरूका लागि एक लाख अमेरिकी डलर (एक करोड ३७ लाख ५१ हजार)बराबरको मानवीय सहयोग पठाएको छ ।

बुधबार चिनियाँ रेडक्रस सोसाइटीको तर्फबाट नेपालका लागि चिनियाँ राजदूत छन सोङले उक्त सहयोग नेपाल रेडक्रस सोसाइटीलाई हस्तान्तरण गरे । उनले एक लाख डलरको चेक हस्तान्तरण नेपाली पक्षलाई हस्तान्तरण गरेका हुन् ।

चेक हस्तान्तरण गर्दै राजदूत सोङले विपद् प्रभावित नेपाली जनताप्रति चीनको सहानुभूति रहेको पनि उल्लेख गरेका छन् ।

रसुवागढीमा असार २४ गते बिहान सवा ३ बजे बिहान चीनतर्फबाट ठूलो बाढी आएको थियो । बाढीले नेपालतर्फ भोटेकोशी नदीबाट ठूलो क्षति भएको छ।

उक्त बाढीले रसुवागढीमा नेपाल-चीन जोड्ने मितेरी पुल बगाएको छ। स्याफ्रुबेंशी–रसुवागढी सडकखण्डमा करिब ११ सय मिटर सडक कटान भएको छ । चीनतिर पनि पहिरो र बाढीले धेरै ठाउँ सडक बिग्रिएको छ ।

रूवा भन्सारको यार्डमा राखिएका ६४ वटा गाडीहरू बगेका थिए। यसमा २३ वटा मालवाहक कन्टेनर, ६ वटा मालवाहक ट्रक र ३५ वटा नयाँ इलेक्ट्रिक सवारी साधन थिए ।

बाढीले रसुवागढी जलविद्युतको ड्याम, चिलिमे जलविद्युत्मा पनि क्षति पुगेको छ । उता माथिल्लो त्रिशूली ए सहित आधा दर्जन जलविद्युत् आयोजनाहरूमा क्षति पुगेको छ । अहिले तीमध्ये कतिपय बन्द अवस्थामा छन् ।

बाढीका कारण ठूलो संख्यामा सुरक्षाकर्मी, भरिया, स्थानीयबासी र चिनियाँ नागरिक फसेका थिए। अहिलेसम्म ९ जनाको शव फेला परेको छ। कम्तिमा २० जना बेपत्ता छन् । बेपत्तामध्ये ३ प्रहरी कर्मचारी र ६ चिनियाँ नागरिकसमेत छन् ।

बाढीपछि नेपाली सेना, प्रहरी, सशस्त्र प्रहरी र सेनाको हेलिकोप्टरले ५५ जनाभन्दा बढी उद्धार गरेको थियो। त्यसक्रममा करिब २ सय जनालाई काठमाडौंसम्म एयरलिफ्ट गरिएको थियो । बाढीपछि अहिले चीन र नेपाल दुवैतर्फ पुननिर्माण अभियान चलिरहेको छ।