काठमाडौं – पूर्वराजा ज्ञानेन्द्र शाहका संवाद सचिव फणिराज पाठकलाई प्रहरीले छाडेको छ । पूर्वराजा शाहसँग सम्बन्धित सूचना तथा विज्ञप्तिहरूमा गैरकानुनी रुपले ‘श्री ५ महाराजाधिराज’ भन्ने शब्द नलेख्ने वाचा गरेपछि उनलाई प्रहरीले छाडेको हो ।

पूर्वराजालाई ‘श्री ५ महाराजाधिराज’ सम्बोधन गरि सुचना निकाल्दै आएका पाठकलाई प्रहरीले शुक्रबार बिहान पक्राउ गरेको थियो । साँझ पौने ८ बजे प्रहरीले उनलाई कागज गराएर, अब यस्ता गल्ती नदोहोर्याउने लिखित प्रतिबद्धता लिएपछि परिवारको जिम्मा लगाएको हो।

प्रहरीले उनीसँग त्यससम्बन्धी सबै पोस्ट हटाउने, भविष्यमा त्यस्तो पोस्ट नगर्ने, र विज्ञप्तिमा यस्ता सम्बोधन प्रयोग नगर्ने वाचा गराएको छ।

यस घटनाले सामाजिक सञ्जालमा ‘श्री ५’ को प्रयोगलाई लिएर सुरु भएको बहसलाई थप चर्काएको छ। कतिपयले पूर्वराजालाई व्यक्तिगत श्रद्धाका आधारमा यस्तो सम्बोधन प्रयोग गर्न पाइने तर्क गरिरहेका छन् भने अर्कोतर्फ संविधानले मान्यता नदिएका पदवीको प्रयोग आपत्तिजनक भएको मत पनि पाइन्छ।