काठमाडौं- नेपाली कांग्रेसका सहमहामन्त्री जीवन परियारले पार्टीकै अगुवाइमा संविधान संशोधन गरिनुपर्ने बताएका छन् ।

नेपाली कांग्रेसको सानेपास्थित केन्द्रीय कार्यालयमा जारी केन्द्रीय कार्यसमिति बैठकमा आइतबार बोल्दै उनले यस्तो बताएका हुन् ।

२०८१ असार १७ गते सात बुँदे सहमति गरेर नेकपा एमालेका अध्यक्ष केपी शर्मा ओलीको नेतृत्वमा बनेको सरकारले अहिलेसम्म संविधान संशोधनको कुरा अघि बढाउन सकेको छैन ।

यसै सन्दर्भमा सह-महामन्त्री परियारले पार्टीकै अगुवाइमा संविधान संशोधनको काम सुरू गर्नुपर्ने बताएका हुन् । कांग्रेससँगको सहमतिअनुसार ओलीको कार्यकाल अब करिब एक वर्ष मात्रै बाँकी रहेको अवस्थामा त्यसपछि शेरबहादुर देउवा प्रधानमन्त्री हुनेछन् ।

यस्तोमा परियारले देउवाको नेतृत्वमा संविधान संशोधन अघि बढ्ने संकेत गरेका हुन् । बैठकलाई सम्बोधन गर्दै परियारले संविधान संशोधनका लागि कांग्रेसको अगुवाइमा संविधान संशोधन समिति बनाउनुपर्ने पनि प्रस्ताव गरेका छन् ।

‘संविधानको धारा ७२ को उपधारा २ अनुसार सरकार बनाउनेलगायत ७ बुँदे सहमति गरे पनि सरकार बनाउनेबाहेक अरू बुँदा कार्यान्वयनमा आउन सकेको छैन,’ उनले बैठकमा भने, ‘संघीय संसदमा प्रतिनिधित्व गर्ने पार्टीकै एक वरिष्ठ नेताको संयोजकत्वमा संविधान संशोधन समिति बनाऊँ ।’