जनकपुरधाम– सर्लाही प्रहरीले वान्टेड सूचीमा राखेका जनता समाजवादी पार्टी (जसपा) मधेस प्रदेशका अध्यक्ष अशोक यादवले आफू फरार नरहेको बताएका छन् ।

आइतबार फेसबुक लाइभमार्फत सार्वजनिक रूपमा बोल्दै उनले आफूविरुद्ध लगाइएको आरोपलाई झुटो भन्दै गम्भीर आपत्ति जनाएका छन् ।

यादवका अनुसार प्रहरी डाँका शैलीमा उनको घरमा पुगेर छोरामाथि कुटपिट गरेको र छोराको गर्दनको नसासमेत च्यातिएको छ । उनले अहिले छोराको उपचारमा व्यस्त रहेको जानकारी दिए । सञ्चारमाध्यममा आफू फरार भएको भनेर आएका समाचारको पनि उनले खण्डन गरे ।

उनले भने, ‘मैले कुनै अपराध गरेको छैन। म त निमुखा, शोषित, पीडित र विपन्न वर्गका लागि आवाज उठाइरहेको छु । जिल्लामा भइरहेको भ्रष्टाचार, बेथिति र लुटतन्त्रविरुद्ध बोलेको हुँ । त्यसका लागि राज्यले मलाई अपराधी ठान्छ भने म सय वटा मुद्दा खेप्न तयार छु, तर जनताको पक्षमा बोल्न कहिल्यै रोकिन्न ।’

यादवले आफूविरुद्ध अनावश्यक रूपमा मुद्दा दर्ता गरिएको दाबी गर्दै चाँडै सर्लाही फर्किने बताए । उनले सर्वसाधारणलाई आन्दोलनमा उत्रन पनि आग्रह गरे । प्रहरीसँगको गालीगलौजबारे स्पष्टीकरण दिँदै उनले एसपीलाई पहिले गाली नगरेको बताए ।

सर्लाही प्रहरीले यादवविरुद्ध सार्वजनिक सेवामा रोकावट र राजनीतिक उपद्रो सम्बन्धी दुई वटा मुद्दामा अदालतबाट पक्राउ पुर्जी जारी गरेको जनाएको छ । बिहीबार राति जिल्ला प्रहरी प्रमुख योगेन्द्रकुमार खड्का र अध्यक्ष यादवबीचको गालीगलौज अडियो सामाजिक सञ्जालमा भाइरल भएको थियो ।