काठमाडौं- नेपाली कांग्रेसका पूर्वमहामन्त्री डा. शशांक कोइरालाले संविधान संशोधनको एजेन्डालाई अघि बढाउनुपर्ने बताएका छन् ।

ललितपुर सानेपास्थित केन्द्रीय कार्यालयमा जारी केन्द्रीय कार्यसमिति बैठकमा आइतबार बोल्दै पूर्वमहामन्त्री कोइरालाले संविधान संशोधनका सन्दर्भमा ठूला प्रस्ताव अघि सारेका छन्।

उनले बैठकमा बोल्दै धर्मनिरपेक्षता हटाएर ‘धार्मिक स्वतन्त्रता’ राख्नुपर्ने बताएका छन्। निर्वाचन प्रणालीमा पनि आमूल परिवर्तन आवश्यक रहेको धारणा उनले राखेका छन् ।

कोइरालाले नेपाली कांग्रेस र नेकपा एमालेबीच २०८१ असार १७ गते भएको सातबुँदे सहमतिलाई स्मरण गर्दै धर्मनिरपेक्षता खारेज गरी ‘धार्मिक स्वतन्त्रता’ कायम गर्नुपर्ने माग राखे।

‘यो सरकार बनाउँदा नै संविधान संशोधन गर्ने कुरा भएको हो। पहिलो संशोधन यही होस् — धर्मनिरपेक्षता हटाएर धार्मिक स्वतन्त्रता कायम गरौँ’, कोइरालाले भने ।

संविधान संशोधनमार्फत प्रतिनिधिसभामा प्रत्यक्ष निर्वाचित सांसद मात्रै राख्नुपर्ने प्रस्ताव कोइरालाले अघि सारे। ‘राष्ट्रिय सभामा समानुपातिक प्रणाली लागू गरौं, तर प्रतिनिधिसभा केवल प्रत्यक्ष निर्वाचित प्रणालीमा आधारित होस्,’ उनले स्पष्ट पारे।

उनको यो प्रस्ताव कार्यान्वयन हुन सकेमा नेपालको हालको मिश्रित निर्वाचन प्रणालीलाई पूर्णतः परिवर्तन गर्ने दिशातर्फ लैजानेछ ।

कोइरालाले पार्टीमा एकताका लागि प्रयासरत रहेको भन्दै सभापति शेरबहादुर देउवालाई धन्यवाद दिए। उनले सांसदको भूमिकामाथि पनि टिप्पणी गरे । ‘हामी सांसद केवल मन्त्री बन्नका लागि हो भन्ने सोच बदल्नुपर्छ। म आफैं पनि चार पटक सांसद भएँ, तर मन्त्री अहिलेसम्म भएको छैन’, उनले भने ।