काठमाडौं– भरतपुर महानगरकी उपप्रमुख पार्वती शाह ठकुरीले महानगरभित्र चरम भष्ट्राचार भएको दाबी गरेकी छिन् । मंगलबार पत्रकार सम्मेलन गरी उपप्रमुख शाहले महानगरले खरिद विक्रीका काममा विधि र प्रक्रिया मिचेको, अनुगमन प्रभावकारी नभएको, सरकारी सवारीसाधनको जथाभावी प्रयोग हुने गरेको दाबी गरेकी हुन् ।

महानगरलाई आवश्यक सामान खरिद विक्रि गर्दा सार्वजनिक खरिद ऐन अनुसार प्रक्रिया पूरा गरी जवाफदेही र पारदर्शी बन्न आफुले पटक पटक ध्यानाकर्षण गराउँदा पनि महानगर प्रमुखले वेवास्ता गरेको आरोप लगाइन् । उनले २४ औं बैठकसम्म आइपुग्दा पनि प्रमुखकै कारण महानगरमा लेखा समिति र जिन्सी समिति गठन हुन नसकेको बताइन् ।

पत्रकार सम्मेलनमा उपप्रमुख शाहले महानगरमा भएका अनियमितता, कर्मचारीमाथि हुने गरेको विभेद तथा सरकारी सवारी साधनको दुरुपयोग लगायत१२ बुँदे फेयरिस्त प्रस्तुत गरेकी थिइन् । सामाजिक सञ्जालमा ज्यानमार्ने धम्की आएकोबारे जानकारी गराउँदै उनले यसलाई नियोजित आक्रमण र षड्यन्त्रको रुपमा बुझेको बताएकी छिन् ।

सामाजिक सञ्जाल मार्फत उपप्रमुख शाहमाथि धम्कीपूर्ण भाषा प्रयोग गरिएको सम्बन्धमा यसअघि नै नेपाली कांग्रेसले विज्ञप्ती जारी गरि आफ्नो गम्भीर ध्यानाकर्षण भएको जनाएको थियो ।