काठमाडौं– प्रमुख सत्तारूढ नेपाली कांग्रेसको केन्द्रीय कार्यसमिति बैठक सानेपामा सुरू भएको छ।

बैठक सोमबार दिउँसो १ बजेदेखि पार्टी केन्द्रीय कार्यालय सानेपामा सुरू भएको मुख्यसचिव कृष्णप्रसाद पौडेलले जानकारी दिए ।

केन्द्रीय समिति बैठकका लागि आइतबार बसेको पदाधिकारी बैठकले विभिन्न एजेण्डा तय गरेको थियो ।

कांग्रेस प्रवक्ता प्रकाशशरण महतकाअनुसार बैठकमा मुख्य रुपमा गठबन्धनको सरकारका साथै भ्रातृसंस्थाका विषयमा छलफल हुँदैछ ।

कांग्रेसका सात भ्रातृसंस्थाको म्याद २०८१ चैत मसान्तमा सकिएको थियो । तोकिएको समयमा महाधिवेशन गर्न नसकेका भ्रातृ संस्थाका तदर्थ समितिको म्याद थप्ने-नथप्ने पनि बैठकमा छलफल हुँदैछ ।

यसैगरी, क्रियाशील सदस्यता वितरणबारे महामन्त्री गगन थापाले बैठकमा जानकारी गराउने छन् । थापा नेतृत्वको क्रियाशील सदस्यता व्यवस्थापन समितिले असार मसान्तसम्म क्रियाशील सदस्यता नवीकरणको समय दिएको छ ।

बैठकमा पार्टीले सञ्चालन गरेको १०० दिने अभियानको कार्यपत्र पेस गरिने, सङ्घीय सरकार र प्रदेश सरकारमा रहेका मन्त्रीहरूका कामकारबाहीका बारेमा जानकारी गराउने एजेण्डा पनि रहेको छ ।

बैठकका प्रस्तावहरू

१) १०० दिने अभियानका प्रतिवेदनहरू
२) केन्द्रीय नीति, अनुसन्धान तथा प्रशिक्षण प्रतिष्ठानको निर्देशिका संशोधन
३) केन्द्रीय नीति, अनुसन्धान तथा प्रशिक्षण प्रतिष्ठानको प्रतिवेदन प्रस्तुत
४) अनुशासन समितिको प्रतिवेदन
५) कृयाशील सदस्यता नवीकरण प्रगति विवरण
६) केही भ्रातृ संस्थाबारे निर्देशक समितिको रायका आधारमा उपयुक्त निर्णय
७) नेपाली जनसम्पर्क समितिको व्यवस्थापन र विस्तार सम्बन्धमा
८) नेपाली कांग्रेसको शुभेच्छुक संस्थाको रुपमा मान्यता प्राप्त ‘नेपाल लोकतान्त्रिक यातायात व्यवसायी संघ’ र ‘नेपाल लोकतान्त्रिक संस्थागत तथा निजी विद्यालय शिक्षक संघ’ (निस्टा) को नाम संशोधन सम्बन्धमा
९) कार्यसम्पादन समिति बैठकको निर्णय अनुमोदन
१०) जनप्रतिनिधि कार्यसम्पादन निर्देशिका पारित गर्ने सम्बन्धमा
११) संसद् र सरकारमा पार्टीको भूमिका प्रभावकारिता (मन्त्रीहरूको प्रतिवेदनसहित छलफल)
१२) समसामयिक विषय (राजनैतिक, सामाजिक, शैक्षिक, प्रशासनिक लगायत)
१३) विविध ।