धनगढी– बाजुरा जिल्लालाई पूर्ण खोप सुनिश्चितता तथा दिगोपना घोषणा गरिएको छ । ‘स्थानीय स्वामित्व र सहभागी, पूर्ण खोप सुनिश्चितता – हाम्रो प्रतिबद्धता ‘ भन्ने नाराका साथ बाजुरालाई पूर्ण खोप सुनिश्चितता तथा दिगोपना जिल्ला घोषणा गरिएको हो ।

विशेष गरी बालबालिकाहरूले, सरकारले तोकेको सबै प्रकारका खोपहरू निश्चित समय अवधिभित्र पूरा गरे पश्चात घोषणा गरिएको स्वास्थ्य कार्यलय बाजुराका प्रमुख महेश चन्दले बताएका छन् । 

उनले ९ वटै स्थानीय तहका बालबालिकाले विभिन्न मितिमा खोप पाएको पछि पालिकालाई घोषणा गरेको थियो भने आज जिल्लालाई घोषणा गरिएको हो ।  बाजुरामा जन्मदेखि १५ महिनासम्मका बालबालिकालाई १३ खोप र किशोरीलाई एच.पी.भी खोप लगाएको निश्चित पछि यो वर्ष घोषणा गरिएको हो । यो वर्ष मात्र नभएर प्रत्येक वर्ष खोपलाई निरन्तरता दिने स्वास्थ्य कार्यलय बाजुराले जनाएको छ ।
 
जिल्ला खोप समन्वय समिति बाजुराको आयोजनामा  कार्यक्रममा भएको कार्यक्रममा स्वास्थ्य स्वयंसेविका तथा स्वास्थ्यकर्मी र ९ वटै पालिकालाई सम्मान गरिएको छ १ जिल्लालाई पूर्ण खोप सुनिश्चितका लागि सहयोग पुर्याउने व्यक्ति तथा पालिकालाई सम्मान गरिएको हो ।

जसमा स्वास्थ्य स्वयंसेविका तुला खड्का र कन्जडी रोकायालाई नगद ५ हजार सहित सम्मान गरिएको छ । खड्का र रोकायालाई उत्कृष्ट कार्यको आधारमा सम्मान गरिएको हो । 

स्वास्थ्यकर्मी हिमाली गाउँपालिकाबाट बिमला पाण्डे, खप्तड छेडेदह गाउँपालिकाबाट राजु सुनार, स्वामीकार्तिकबाट कमल कटेल, जगन्नाथबाट भावना शाही, गौमुल बिमला रोकायालाई नगद ५ सहित दोसल्लाले सम्मान गरिएको छ ।

बुढीगंगा नगरपालिकाबाट हस्त बहादुर कडायत, त्रिवेणी नगरपालिका लक्ष्मी ऐडि, बुढीनन्दा नगरपालिकाबाट सुशीला गिरि सम्मानित भएका छन् । प्रमुख जिल्ला अधिकार लेखनाथ पाध्याले आज पूर्ण खोप भयो भनेर चुप बस्न नहुने बताएका छन् । 

पूर्ण खोप सुनिश्चितताका लागि नियमितता, निरन्तरता दिइरहनुपर्ने बताएका छन् । बाजुरा जिल्लालाई पूर्ण खोप सुनिश्चितता तथा दिगोपना घोषणा गर्न सहयोग पुर्याउने स्वास्थ्य स्वयमसेविका, स्वास्थ्यकर्मी लगायत अन्य सरोकारवालालाई धन्यवाद दिएका छन् । उहाँहरूले गरेको कामको प्रशंसा गर्दै स्वयंसेविकाको हकमा सरोकारवाला निकायले ध्यान दिनु पर्ने बताएका छन् । 

सेवकको रुपमा काम गर्दै आएका उनीहरूलाई उचित मुल्यांकन गर्नु पर्ने बताएका छन् । जिल्ला खोप समन्वय समिति प्रमुख तुलसीराम रोकायाले कार्यक्रममा सम्मानितलाई बधाइ दिँदै पूर्ण खोप सुनिश्चिततामा सहयोग गर्ने सम्पूर्णलाई धन्यवाद दिएका छन् । 

आगामी दिनमा सहयोगका लागि अपेक्षा व्यक्त गरे । कार्यक्रममा जिल्लास्थित स्वास्थ्यकर्मी, सुरक्षाकर्मी, सञ्चारकर्मी लगायत विभिन्न सङ्घसंस्थाका प्रतिनिधि सहभागी थिए ।