काठमाडौँ – ललितपुरको मङ्गलबजारमा चीनको तिब्बत (सिजाङ) चिनाउने तस्बिर प्रदर्शनीमा राखिएको छ ।

मङ्गलबारदेखि सुरू प्रदर्शनीमा ८५ वटा तस्विर राखिएका छन् । तिब्बत चिनाउने यी तस्बिरहरू स्वदेशीदेखि विदेशी पर्यटकले समेत चाख लगाएर हेरेका छन् ।

मङ्गलबजार क्षेत्रमा घुमिरहेका स्वदेशी तथा विदेशीहरूले यी तस्बिरमार्फत् तिब्बतलाई जान्ने प्रयास गरेका छन् । तिब्बतको कला संस्कृतिसँगै त्यहाँको विकासमेत प्रदर्शनीमा राखिएका तस्बिरमा देखाउन खोजिएको छ ।

पाटन दरबार स्क्वायरमा प्रदर्शनीमा राखिएको पोताला दरबारको तस्बिरले धेरैजसोको ध्यान तानेको थियो । ल्हासा-सिगात्से एक्सप्रेस वेसहित ठूला र फराकिला सडकले धेरैलाई चकित बनाएको थियो ।

नेपाल-चीन कूटनीतिक सम्बन्ध स्थापनाको ७० औँ वर्षका अवसरमा शनिबारदेखि आयोजित सांस्कृतिक सप्ताहअन्तर्गत पाटन दरबार स्क्वायरमा मङ्गलबार तस्बिर प्रदर्शनी आयोजना गरिएको हो ।

उक्त प्रदर्शनी सिजाङ इन्टरनेशनल कम्युनिकेशन सेन्टर र नेपाल चाइना मिडिया फोरमको आयोजनामा गरिएको हो ।