धनगढी — सुदूरपश्चिमको आन्तरिक मामिला तथा कानुन मन्त्रालयले दुई महिनाअघि खरिद गरेका प्रहरी भ्यान प्रदेश प्रहरी प्रमुखको कार्यालयलाई हस्तान्तरण गरेको छ ।

बुधबार आन्तरिक मामिला तथा कानुनमन्त्री प्रकाशबहादुर शाहले प्रदेश प्रहरी प्रमुख डिआइजी तारिणिप्रसाद लम्साललाई ९ वटा गाडीको साँचो हस्तान्तरण गरेका हुन् ।

गत आर्थिक वर्षको असार मसान्तमा ३ करोड ३२ लाख ९१ हजारमा खरिद भएका ती गाडीहरु मन्त्रालयमा थन्किएका थिए । गाडी खरिद गरिएको भएपनि हस्तान्तरण गर्न कानून बाधक भएको भन्दै नयाँ गाडीहरु यत्तिकै थन्किएका थिए ।

ती गाडीहरु प्रदेश प्रहरी गठन भएपछि मात्र जिल्लालाई हस्तान्तरण गर्ने भन्ने बजेट शीर्षकमा उल्लेख भएकाले मन्त्रालयमै थन्किएका थिए ।

मंगलबार सुदूरपश्चिम प्रदेशको मन्त्रिपरिषद्ले ती गाडीहरु जिल्लालाई हस्तान्तरण गरेसँगै वितरण गर्ने बाटो खुलेको हो ।