इस्लामावाद– अमेरिकाले इरानका परमाणु स्थलहरूमा गरेको आक्रमणको पाकिस्तानले कडा शब्दमा निन्दा गरेको छ। 

पाकिस्तानले यस्ता आक्रमणहरूलाई अन्तर्राष्ट्रिय कानुनको उल्लङ्घन भनेको छ । इरानलाई आत्मरक्षा गर्ने पूर्ण अधिकार रहेको पनि पाकिस्तानले उल्लेख गरेको छ। 

पाकिस्तानको विदेश मन्त्रालयद्वारा जारी विज्ञप्तिमा भनिएको छ, ‘संयुक्त राष्ट्र संघको चार्टरअनुसार इरानलाई आफ्नो सार्वभौमिकता र नागरिकहरूको सुरक्षाका लागि प्रत्युत्तर दिने अधिकार प्राप्त छ ।’

पाकिस्तानले चेतावनी दिँदै यदि यो तनाव अझै बढ्यो भने यसको प्रभाव केवल मध्यपूर्वमा मात्रै सीमित नहुने उल्लेख गरेको छ । उसले सम्पूर्ण विश्वमा पर्ने तनावका लागि अमेरिका र इजरायल जिम्मेवार हुनुपर्ने पनि उसले उल्लेख गरेको छ। ।

पाकिस्तानले सबै पक्षहरूलाई संयम अपनाउन, सर्वसाधारणको ज्यान र सम्पत्तिको रक्षा गर्न तथा तनावलाई तत्काल रोक्न आग्रह गरेको छ।

उता साउदी अरबले अमेरिकी आक्रमणपछि इरानलाई संयमित हुन आग्रह गरेको छ । 

इरानमाथिको अमेरिकी हवाई आक्रमणपछि साउदी अरबले प्रतिक्रिया दिँदै यस्तो भनेको हो । साउदी विदेश मन्त्रालयद्वारा जारी विज्ञप्तिमा विशेष गरी इरानका परमाणु साइटहरूमा भइरहेका आक्रमणहरूलाई लिएर गम्भीर चिन्ता जनाएको हो ।

साउदी अरबले अवस्था झन् खराब हुन नदिन  सबै पक्षहरूलाई संयम अपनाउन, तनावलाई अझ चर्किन नदिन र स्थिति नियन्त्रणमा राख्ने प्रयास गर्न आह्वान गरेको छ ।