काठमाडौं– राप्रपा नेपालका महामन्त्री राजाराम बर्तौलाले मुलुकमा अहिलेको संघीय धर्मनिरपेक्ष गणतन्त्र ब्यवस्था अझै लामो समय रहिरहने हो भने देश टाट पल्टिने बताएका छन् । पार्टी निकट मजदुरहरूको संगठन ट्रेड युनियन महासंघ नेपाल (टुकोन) द्वारा आज काठमाडौंमा आयोजित कार्यक्रममा बोल्दै बर्तौलाले यो व्यवस्थाले भ्रष्टहरू मात्र उत्पादन गरेको भन्दै ब्यङ्ग गरे ।

 गणतन्त्र लुटतन्त्रमा रूपान्तरण भएको यो ब्यवस्था भ्रष्टाचारीहरूको संरक्षक भएको भन्दै उनले अब ब्यवस्था र प्रणालीको परिवर्तन अत्यावश्यक भएकोमा जोड दिए । व्यवस्था परिवर्तन गर्न जनता उठ्नु पर्ने भन्दै बर्तौलाले मुलुकको ७५३ स्थानीय तहमा आन्दोलनको औचित्य र आवश्यकताबारे बहस छलफल हुने समेत बताए । 

‘हामी आन्दोलनको आन्तरिक तयारीमा जुट्नु छ , अनि एकै पटक मुलुकलाई जुरुक्क उठाउनु छ , यो अहिलेको प्रधान विषय हो’ उनले थप स्पष्ट पारे । उनले थपे कुशासन, मनपरितन्त्र , धर्मपरिवर्तन, बेरोजगारी, महङ्गी सबै कुरालाई टुलुटुलु हेरेर बस्ने होइन अब विद्रोहको तयारी गर्ने हो’ । कार्यक्रममा टुकोनका अध्यक्ष एवं राप्रपा नेपालका सहमहामन्त्री हिक्मतजङ्ग भण्डारीले अबको आन्दोलनमा श्रमजीवी बर्गले अग्रभागमा रहेर नेतृत्व लिनुपर्नेमा जोड दिए ।

सो अवसरमा नेताहरू डम्बर शिवाकोटी, राजेन्द्र लाखा , अजेलिया रन्जितकार, सङ्गिता लाखाजु लगायतले बोलेका थिए भने जेटयुसिसिका स्रोत व्यक्ति रामचन्द्र कार्कीले प्रशिक्षण दिएका थिए ।