लेटाङ, मोरङ — आधुनिक प्रविधिको विकाससँगै मानिसले दैनिक प्रयोग गर्न छाडेकाले जाँतो हराउँदै गएको छ । ढुंगा कुँदेर बनाइने परम्परागत जाँतोको मोरङको लेटाङमा स्मरण गराउन खोजिएको छ । लेटाङमा नेपालकै सबैभन्दा ठूलो जाँतो अहिले पर्यटकको रोजाई बनिरहेको छ ।

लेटाङ नगरपालिका–९ मा करिब १५ धुर क्षेत्रफलमा फैलिएको उक्त जाँतो हाल सार्वजनिक अवलोकनका लागि खुला गरिएको छ।

देशको प्रमुख पूर्व-पश्चिम राजमार्गबाट ८ किलोमिटर दूरीमा रहेको जाँतो राखिएको ठाउँमा अहिले पर्यटकहरूको घुइँचो लाग्न थालेको छ।

उक्त जातो कोशी सरकारको १० लाख रुपैयाँको सहयोग र स्थानीयवासीको ४ लाख बराबरको जनश्रमदानमा निर्माण गरिएको हो।

जाँतोसँगै आकर्षक पार्क पनि निर्माण भइसकेको छ, जसले पर्यटकहरूलाई थप आकर्षण प्रदान गरिरहेको छ।

लेटाङ-९ का वडाध्यक्ष नन्दकिशोर दाहालले भने, ‘गाउँघरमा कहिल्यै नछुट्ने जाँतो अहिले इतिहास बन्दै गएको छ । यसलाई आधुनिक स्वरूपमा पुनर्जीवित गरेर पर्यटन प्रवर्द्धन र सांस्कृतिक संरक्षण दुवैलाई सघाउने उद्देश्य राखिएको छ ।’

जाँतोबाट नै मोरङको जाँते क्षेत्रको नामकरण गरिएको हो । यो जाँतो ग्रामीण संस्कृति र पहिचानको प्रतीक पनि बनेको छ। अब यो स्था सांस्कृतिक धरोहरसँगै आन्तरिक पर्यटनको नयाँ केन्द्र बन्दै गएको छ।