काठमाडौं- जिल्ला अदालत काठमाडौंले नेपालखबर डटकम र बिजमान्डु डटकमले प्रकाशित गरेका समाचार ‘डिलिट’ (मेटाउनु) गर्नुपर्ने भन्दै यसअघि दिएको आदेश खारेज गरेको छ ।

न्यायाधीश श्यामबिहारी मौर्यको इजलासले बिहीबार ती दुवै अनलाइनमा प्रकाशित समाचार मेटाउनुपर्ने यसअघिको आदेश खारेज गरेको हो ।

नेपाल धितोपत्र बोर्डका अध्यक्ष सन्तोषनारायण श्रेष्ठले दायर गरेको निषेधाज्ञाको निवेदन खारेज भएसँगै सञ्चारमाध्यमहरूले समाचार मेटाउनु नपर्ने भएको छ ।

यसअघि जिल्ला अदालतका अर्का न्यायाधीश पिताम्बर शर्माको इजलासले दुवै सञ्चारमाध्यमहरूलाई समाचार मेटाउन आदेश दिएको थियो ।

सन्तोषनारायणले आफ्नो व्यक्तिगत जीवन र चरित्रमा ती दुवै अनलाइको समाचारका कारण गम्भीर क्षति पुगेको भन्दै जिल्ला अदालतमा निवेदन हालेका थिए ।