काठमाडौं– जल तथा मौसम विज्ञान विभागले सिन्धुपाल्चोक जिल्ला भएर बग्ने भोटेकोशी र सुनकोशी नदी तटीय क्षेत्रका बासिन्दालाई उच्च सतर्कता अपनाउन आग्रह गरेको छ । 

छिमेकी राष्ट्र चीनको तिब्बत क्षेत्रमा भारी वर्षा हुन सक्ने र त्यसले नदीमा पानीको सतह बढ्न सक्ने सूचनाका आधारमा विभागले यस्तो आग्रह गरेको हो ।

चीनको प्रहरी कार्यालयबाट जारी सूचनामा असार ७ गतेसम्म भोटेकोशी नदीको मुहान क्षेत्र तिब्बतमा अत्यधिक वर्षा हुन सक्ने उल्लेख छ । यसले भोटेकोशी र सुनकोशी नदीमा पानीको बहाव बढ्न गई बाढीको जोखिम निम्त्याउन सक्ने चेतावनी दिइएको छ ।

विशेषगरी भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, सुनकोशी गाउँपालिका, बलेफी गाउँपालिका र चौतारा साँगाचोकगढी नगरपालिकाका नदीतटीय क्षेत्रहरू उच्च जोखिममा रहेको विभागले जनाएको छ ।