काठमाडौं– प्रतिपक्षी राष्ट्रिय स्वतन्त्र पार्टी (रास्वपा) ले सत्तारूढ नेपाली कांग्रेसलाई प्रश्न गरेको छ । कांगेसले निलो रिबन लगाएर गएका सांसदहरूलाई संसद् बैठकबाट बाहिर निकाल्नु पर्ने माग गरेपछि रास्वपाले प्रश्न गरेको हो । 

मंगलबारको प्रतिनिधिसभा बैठक आधा घण्टाका लागि स्थगित भएपछि रास्वपाका कार्यवाहक प्रवक्तासमेत रहेका सांसद मनिष झाले एक्स (ट्विटर)मार्फत् कांग्रेसलाई सोधका छन्, ‘सदनमा रातो मफलर लगाउन पाउने तर नीलो नलगाऊ भन्ने कुन नियमावलीले भन्छ ?’

त्यसअघि कांग्रेसले भिजिट भिसा प्रकरणमा मुछिएका गृहमन्त्री रमेश लेखकको राजीनामा माग्दै विरोधमा उत्रिएका रास्वपाका सांसदहरूलाई संसद् बैठकबाट निष्कासन गर्न माग गरेको थियो । 

बैठकमा नियमापत्ति जनाउने क्रममा कांग्रेसका प्रमुख सचेतक श्याम घिमिरेले भनेका थिए, ‘सभामुख महोदय, संसद् सचिवालयको नियमावली ३० मा अभद्र व्यवहार नियन्त्रणको व्यवस्था छ । नियम ३१ मा बैठक कक्षबाट निष्कासन गर्ने व्यवस्था छ । नीलो स्कार्फ लगाएर संसद्मा आउनु मर्यादित हुन्छ कि हुँदैन ? भोलि हाफ पाइन्ट मात्रै लगाएर आउने, जथाभावी पोशाकमा आउने गरे, त्यो संसद्को मर्यादामा पर्छ कि पर्दैन ?’