काठमाडौं- प्रमुख प्रतिपक्षी नेकपा माओवादी केन्द्रले भिजिट भिसा सेटिङसहितका भ्रष्टाचार प्रकरणमा सरकारले छानबिन गर्ने विश्वाससहित संसद् खोलेको बताएको छ ।

शुक्रबार बसेको प्रतिनिधिसभाको बैठकमा संसद् सुरू प्रतिपक्षी राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)को अवरोधका बीच आफ्नो भनाइ राख्दै माओवादी प्रमुख सचेतक हितराज पाण्डेले यसो भनेका हुन् ।

‘हामीले भिजिट भिसासहितका प्रकरणलाई लिएर दुई सातादेखि संसद्मा अवरोध गरेका थियौँ’, उनले भने, ‘तर हामीले यसबीचमा गरेको संवादपछि सरकारले यी प्रकरणसहितका भ्रष्टाचारको छानबिन गर्ने विश्वास पाएका छौँ । सरकारले छानबिन गर्ने भएकाले अब हामी जनजीविकाका सवाल उठाउन संसद् खुलाउने निर्णयमा पुगेका छौँ ।’

उनले बोल्दै गर्दा विपक्षी रास्वपा र राप्रपाले टेबल बजाउँदै उठेर विरोध गरिरहेका थिए । माओवादीले शुक्रबार सत्तारुढ दलसँग दुई बुँदे सहमति गर्दै आफ्नो आन्दोलन टुंग्याएको छ। तर उक्त सहमतिमा गृहमन्त्री रमेश लेखकको राजीनामा र छानबिन समित दुवै समावेश छैनन् ।