चितवन- चितवनको एक कागजको कार्टुन बनाउने फ्याक्ट्रीमा आगलागी भएको छ ।

कागजका कार्टुनहरु उत्पादन गर्ने भरतपुर महानगरपालिका–४ नारायणगढ बाह्रघरेमा रहेको युनाइटेड प्याकेजिङ प्रालिमा आगलागी भएको हो ।

चट्याङपछि कारखानामा आगोको मुस्लो देखिएको स्थानीयले बताएका छन् । कारखानाका सञ्चालक भद्रनारायण पियाले बिहान पौने तीन बजेतिर आगलागीको खबर पाएको जानकारी दिए ।

चट्याङकै कारण आगलागी भएको सञ्चालक पियाको अनुमान छ । आगोले उत्पादन भएका कार्टुनहरु र कार्टुन उत्पादन गर्न गोदाममा राखेका कागजका ठूल्ठूला रोलहरु सबै नष्ट भएको जनाइएको छ ।

आगलागीबाट भएको क्षतिको विवरण आउन बाँकी रहेको छ । आगो नियन्त्रणको प्रयास जारी रहेको प्रहरीले जनाएको छ ।

भरतपुर महानगरपालिकाका दुईवटा र खैरहनी र कावासोती नगरपालिकाका एक एकवटा दमकल, प्रहरी र स्थानीयको सहयोगमा आगो नियन्त्रणको प्रयास जारी रहेको छ ।