काठमाडौं– सत्ता साझेदार नेपाली कांग्रेसको राज्य प्रशासन विभागले सुशासन कायम गर्ने विषयमा सरकारको ध्यानाकर्षण गराउने निर्णय गरेको छ । केन्द्रीय सदस्य गोविन्द भट्टराई प्रमुख रहेको विभागको बिहीबार पार्टी कार्यालय सानेपामा बसेको बैठकले सुशासन कायम गर्ने विषयमा सरकारको ध्यानाकर्षण गराउने निर्णय गरेको हो । 

बैठकपछि निर्णय सार्वजनिक गर्न जारी गरिएको विभागको विज्ञप्तिमा भनिएको छ, ‘देशमा सुशासन कायम हुन नसकेको व्यापक जनगुनासो आइरहेको हुँदा सुशासन कायम गर्ने विषयमा सरकारको गम्भीर ध्यानाकर्षण गराउँदछौँ ।’

बैठकले राज्य प्रशासनका समस्या र समाधानका उपायहरूबारे चाँडै अन्तरक्रिया कार्यक्रम गर्ने निर्णय गरेको विभागले जनाएको छ । काग्रेसको राज्य प्रशासन विभागले संघीय निजामती सेवा ऐन यथाशीघ्र जारी गर्न पनि सरकारलाई आग्रह गरेको छ । 

‘आन्दोलनरत तीनै तहका कर्मचारीहरूले उठाएका जायज मागहरू सम्बोधन गरी संघीय निजामती सेवा ऐन यथाशीघ्र जारी गरियोस्,’ विभागले भनेको छ ।